პარლამენტის თავმჯდომარის, ირაკლი კობახიძის განცხადებით, პრეზიდენტი ახლადშექმნილ უსაფრთხოების საბჭოში არ უნდა იყოს წარმოდგენილი, რადგან ის სახელმწიფოს სიმბოლური მეთაურია. მისი თქმით, ქვეყნის პირველი პირი პრემიერ-მინისტრია და საბჭოში სწორედ ის უნდა იყოს. კობახიძე განმარტავს, რომ აღნიშნული საკითხი არის სამართლებრივი და გადაწყვეტილების მიღებამდე მთავრობა იმსჯელებს.

პრეზიდენტის საპარლამენტო მდივანი დიმიტრი გაბუნია აცხადებს, რომ საბჭოში პრეზიდენტიც უნდა იყოს. უსაფრთხოების კომიტეტის თავმჯდომარე ირაკლი სესიაშვილმა კი განმარტა, რომ პრეზიდენტი, როგორც უმაღლესი მთავარსარდალი ინფორმირებული იქნება თავდაცვის საკითხების შესახებ, მაგრამ უსაფრთოხების საბჭო პრემიერის აპარტთან არსებული სათათბირო ორგანო იქნება და შემადგენლობაში პრეზიდენტი ვერ შევა.

სალომე ზურაბიშვილის გაპრეზიდენტების შემდეგ ქვეყანაში ახალი კონსტიტუცია ამოქმედა და პრეზიდენტის სათათბირო ორგანო, ეროვნული უშიშროების საბჭო გაუქმდა. ხელისუფლებაში ამბობენ, რომ უსაფრთხოების პოლიტიკის დაგეგმვისა და კოორდინაციის სფეროში, სტრატეგიულ დონეზე გარკვეული ინსტიტუციური ვაკუუმი შეიქმნა. ამიტომ, საქართველოს მთავრობამ შეიმუშავა კანონპროექტი, რომელიც პრემიერ-მინისტრის სათათბირო ორგანოს შექმნას გულისხმობს.

კანონპროექტის განმარტებით ბარათში წერია, რომ შინაარსობრივად, საბჭო (მისი აპარატით) არის პრემიერ-მინისტრთან არსებული ანალიტიკური ცენტრი, რომელიც სტრატეგიულ დონეზე პოლიტიკის დაგეგმვის მანდატით აღიჭურვება, თუმცა არ აქვს ოპერაციულ დონეზე ფუნქციონირების უფლებამოსილება. საბჭოს მანდატი ითვალისწინებს უსაფრთხოების საკითხებზე მომუშავე უწყებების კოორდინაციას.