ეროვნული ფორუმის ლიდერი გუბაზ სანიკიძე დავით უსუფაშვილის ინიციატივას ეხმიანება საქართველოში ამერიკული ბაზების განთავსების თაობაზე და აცხადებს, რომ ეს წინასაარჩევნო ნაბიჯია:

"ღრმა პატივისცემას ვაფიქსირებ რესპუბლიკური პარტიის მიმართ, თუმცა საარჩევნო პროცესი ასეთ ხასიათს იღებს უკვე საქართველოში, ვინც უფრო მეტ და საინტერესო სამხედრო ძალების მოწვევას დააპირებს, ალბათ ისე აპირებენ არჩევნების მოგებას. ასე გავიგე მე. ეს ერთ რამეზე მეტყველებს, პოლიტიკური კლასის დიდი ნაწილი უკვე აღარ ფიქრობს რამე გაუკეთოს ამ ქვეყანას და სხვის იმედზე ვართ ამ სიტუაციაში. ამერიკა არის საქართველოს დამოუკიდებლობის გარანტორი, მაგრამ ეს ასე მარტივიც არ არის".

საქართველოს რესპუბლიკური პარტიის ლიდერმა დავით უსუფაშვილმა გუშინ ტელეკომპანია რუსთავი 2-ის ეთერში განაცხადა, რომ საქართველოს ნომერ პირველი პრობლემა უსაფრთხოებაა, ხოლო რესპუბლიკურ პარტიას "აქვს ძალიან მკაფიო ხედვა", რაც ნატოში გაწევრიანებამდე საქართველოს ტერიტორიაზე აშშ-ის სამხედრო ბაზების განთავსებას გულისხმობს.