საქართველოს რესპუბლიკური პარტიის ლიდერი, დავით უსუფაშვილი ნომერ პირველ პრობლემად უსაფრთხოებას ასახელებს. მისივე თქმით, რესპუბლიკურ პარტიას "აქვს ძალიან მკაფიო ხედვა", რაც ნატოში გაწევრიანებამდე საქართველოს ტერიტორიაზე აშშ-ის სამხედრო ბაზების განთავსებას გულისხმობს. ამის შესახებ უსუფაშვილმა ტელეკომპანია რუსთავი 2-ის ეთერში განაცხადა:

"რესპუბლიკური პარტია ამ არჩევნების წინ და არჩევნების შემდგომ ისახავს მიზნად ძალიან მნიშვნელოვანი ამოცანის შესრულებას. მანამ, სანამ ნატოს წევრობა გახდება რეალობა, საქართველომ უნდა იზრუნოს საქართველოში აშშ-ის სამხედრო ბაზის განთავსებაზე. ეს არის ჩვენი ქვეყნის უსაფრთხოებისთვის, ჩვენი ქვეყნის დაცვისთვის აუცილებელი ამოცანა, რომელიც, დარწმუნებული ვარ, რესპუბლიკურ პარტიასთან ერთად უნდა დაისახოს ქართულმა სახელმწიფომ. ეს, ჩვენი აზრით, დღეს, 2016 წელს საქართველოსთვის არის სასიცოცხლო მნიშვნელობის ამოცანა".

უსუფაშვილმა ასევე ხაზი გაუსვა თავის ინიციატივას, რომ საქართველოს კონსტიტუციაში გაკეთდეს საქართველოს ევროატლანტიკური მისწრაფებებზე ჩანაწერი:

"ნატოს წევრობა ეს არის აუცილებელი ამოცანა ჩვენი ქვეყნის. საქართველოს კონსტიტუციაში ერთხელ და სამუდამოდ ამ საკითხის გადაწყვეტა და ჩაწერა, რომ საქართველოს მოსახლეობის ურყევი ნებაა, რომ საქართველომ დაიმკვიდროს ღირსეული ადგილი ევრო-ატლანტიკურ სივრცეში დემოკრატიული სახელმწიფოების თანამშრომლობის და უსაფრთხოების სისტემაში".