შინაგან საქმეთა სამინისტრომ "ქურდული სამყაროს" წევრობის, "ქურდულ შეკრებაში მონაწილეობის" და "ქურდული სამყაროს" საქმიანობის მხარდაჭერის ბრალდებით, 5 პირი დააკავეს. ბრალის დამტკიცების შემთხვევაში დაკავებულებს 6-დან 10 წლამდე ვადით თავისუფლების აღკვეთა ელოდებათ.

გამოძიების მტკიცებით, მიმდინარე წლის 27 იანვარს თბილისში, ერთ-ერთ საცხოვრებელ ბინაში მოქალაქისა და ბიზნესმენს შორის უთანხმოების გადაწყვეტისთვის ე.წ. ქურდული შეკრება გაიმართა, რომელშიც კრიმინალური სამყაროს 5 წევრი მონაწილეობდა. უწყების ინფორმაციით, ამავე შეკრებაში ელექტრონულად ჩაერთო 2016 წლიდან ინტერპოლით ძებნილი ქართველი ე.წ. კანონიერი ქურდი სულხან ჯაფარიძე (წარსულში სულხან თვალჭრელიძე).

პოლიციამ ხუთივე პირი მიმდინარე წლის 11 თებერვალს თბილისში დააკავა. ინტერპოლით ძებნილ ქართველ ე.წ. კანონიერ ქურდ სულხან ჯაფარიძეს კი ბრალი დაუსწრებლად წარედგინება.

შსს ცნობით, დაკავებულების საცხოვრებელი ბინების და ავტომანქანების ჩხრეკისას ნივთმტკიცებად ამოიღო სხვადასხვა ტიპის, სავარაუდოდ, ცეცხლსასროლი იარაღი და საბრძოლო მასალა, რომლებზეც დანიშნულია შესაბამისი ექსპერტიზები.

გამოძიება "ქურდული სამყაროს" წევრობის, "კანონიერი ქურდობის", "ქურდულ შეკრებაში მონაწილეობისა" და "ქურდული სამყაროს" საქმიანობის მხარდაჭერის ფაქტებზე, საქართველოს სისხლის სამართლის კოდექსის 2231-ე პრიმა მუხლის პირველი და მე-2 ნაწილებით, 2232-ე მუხლით და 2233-ე მუხლის პირველი ნაწილით მიმდინარეობს.