საქართველოს პრეზიდენტის ადმინისტრაციაში სალომე ზურაბიშვილის ნათესავები დასაქმდნენ. ამის შესახებ ინფორმაცია პირველად რუსთავი 2-მა გაავრცელა. ტელეკომპანიის მტკიცებით, ზურაბიშვილის გერი, ნანა კაშია და მისი ქმრის დისშვილი, ქეთევან მიქაძე მრჩევლების პოზიციაზე, კონკურსის გარეშე დაინიშნენ.

პრეზიდენტის პრესსპიკერმა, ხატია მოისწრაფიშვილმა On.ge-ს ამ ადამიანების ადმინისტრაციაში დასაქმება დაუდასტურა და უთხრა, რომ ისინი არა მრჩევლებად, არამედ კონსულტანტებად დასაქმდნენ.

"არსებითი სხვაობაა მრჩეველსა და კონსულტანტს შორის. ნანა კაშიას აქვს ევროკავშირის საქართველოს წარმომადგენლობაში 24-წლიანი სამუშაო გამოცდილება პოლიტიკურ განყოფილებაში. ის იქ მუშაობდა მუდმივი კონტრაქტით. მას უვადო კონტრაქტი და გაცილებით მაღალი ანაზღაურება ჰქონდა. მათი დასაქმება მოხდა კანონთან სრულ შესაბამისობაში", — ამბობს მოისწრაფიშვილი. მისივე ინფორმაციით, ქეთევან მიქაძე საქართველოს ლატარიის კომპანიაში მუშაობდა.

მოისწრაფიშვილის განმარტებით, ეს არის დროებითი კონტრაქტები და როდესაც ადმინისტრაციაში რეორგანიზაციის პროცესი დასრულდება, ისინი კონკურსს გაივლიან.