საარჩევნო პროგრამის პრეზენტაცია გამართა დღეს საარჩევნო ბლოკმა პაატა ბურჭულაძე - მოძრაობა სახელმწიფო ხალხისთვის. საარჩევნო ბლოკმა დაპირებები სხვა მიზნობრივი ჯგუფების მსგავსად ცალკე გამოყო მასწავლებლებისთვის.

პაატა ბურჭულაძე - მოძრაობა სახელმწიფო ხალხისთვის მასწავლებლებს სასერტიფიკატო გამოცდების გაუქმებას, სკოლებს კი სრულ ავტონომიას ჰპირდება.

"ფინელი კოლეგების მსგავსად იქნებით დაფასებული და გექნებათ სრული თავისუფლება საქმიანობაში", - წერია ბურჭულაძის საარჩევნო ბლოკის პროგრამაში.

გარდა ამისა, აღნიშნული საარჩევნო ბლოკი გეგმავს, რომ თითოეული ბავშვის სწავლისთვის ბიუჯეტიდან წელიწადში 1 200 ლარი გამოყოს. მათივე დაპირების მიხედვით, სტუდენტები გაჭირვებული ოჯახებიდან, უმაღლესი განათლებისთვის 100-პროცენტიან გრანტს მიიღებენ.

ბლოკში, პაატა ბურჭულაძე - მოძრაობა სახელმწიფო ხალხისთვის, გაერთიანებული არიან ახალი მემარჯვენეები, გირჩი და გიორგი ვაშაძის ახალი საქართველო.