ეკა ბესელია დღეს შინაგან საქმეთა მინისტრის მოადგილეს შეხვდა და იმ პირთა წრე დაასახელა, ვინც, სავარაუდოდ, მისი პირადი ცხოვრების ამსახველი კადრები გაავრცელა.

"ვისაც მე ვებრძვი, ვისაც მე ვუპირისპირდები, მე იმ ადამიანებისგან ველოდები ყველა აკრძალული მეთოდის გამოყენებას", — თქვა ეკა ბესელიამ და კითხვაზე, აქვს თუ არა ეჭვი თავის თანაგუნდელებზე, პასუხობს, რომ მათ ის თანაგუნდელებად არ მიიჩნევს:

"მე არ მივიჩნევ ასეთ ადამიანებს თანაგუნდელებად, მე მივიჩნევ ასეთ ადამიანებს ან სააკაშვილის ხელისუფლების წარმომადგენლებად, ან მათ გამგრძელებლად, მიუხედავად იმისა, რომელი პოლიტიკური ქოლგის ქვეშ არიან. პირთა წრე, ვისაც მე არ გამოვრიცხავ, ესაა სააკაშვილის ხელისუფლება და მისი წარმომადგენლები. არ გამოვრიცხავ იმ ჯგუფს, რომელიც არის სასამართლოს შიგნით".

ბოლო რამდენიმე დღეა ინტერნეტში ეკა ბესელიას პირადი ცხოვრების ამსახველი კადრები ვრცელდება. ორივე შემთხვევაში დეპუტატმა საჯაროდ თქვა, რომ ეს ვიდეომასალა მას ფარულად გადაიღეს. ვიდეომასალის გავრცელებას წინ უსწრებდა ბესელიას დაპირისპირება იმ 10-კაციან სიასთან, რომელიც უზენაეს სასამართლოში უვადო მოსამართლეებად უნდა გამწესებულიყო.

გაიგეთ მეტი: ვის ინტერესებში შეიძლება, იყოს ჩანაწერების გავრცელება — ეკა ბესელიას ვერსია და ეჭვები