საქართველოს პარლამენტის დეპუტატი, ეკა ბესელია ამბობს, რომ მისი პირადი ცხოვრების ამსახველი კადრების გავრცელება დროში ემთხვევა მოსამართლეების შესახებ მის ღია განცხადებებს. დეპუტატმა თავის ეჭვებსა და ვერსიებზე TV პირველის ეთერში ისაუბრა.

"მიზანი რა უნდა იყოს? ამ პროცესში რომ დგახარ, მყარად, იმ წერტილში, რომელიც უკავშირდება სამართლიანობის იდეის დაცვას, ამ პროცესიდან გაგიყვანონ; ამ პროცესში გაგაჩერონ; დისკრედიტაცია მოახდინონ, მორალურად გაგტეხონ; თქვა, რომ აღარ გინდა, არ შეგიძლია ეს ბრძოლა — მიზანი ეს არის... ეს არის მიუღწეველი მიზანი... ასეთი ქმედება უკუქმედებას იწვევს ჩემში, მიძლიერდება შინაგანი ძალა", — თქვა დეპუტატმა.

მისი თქმით, მან საჯარო განცხადებებით დაიწყო ბრძოლა მოსამართლეთა იმ ჯგუფის წინააღმდეგ, რომლებსაც ვიწრო ინტერესებიდან გამომდინარე თავიანთი თავის ან თავისი მეგობრების უზენაესი სასამართლოს მოსამართლეობა სურდათ. მას არ უთქვამს, რომ მის წინააღმდეგ მისი პარტიის წევრები არ იბრძვიან, თუმცა აღნიშნა, რომ ვიდეომასალის გავრცელება "არაფერში სჭირდება" შინაგან საქმეთა სამინისტროს, პროკურატურასა და სახელმწიფო უსაფრთხოების სამსახურს.

"როგორც ჩანს მხოლოდ მოსამართლეთა ეს ჯგუფი არა არის, ამ ჯგუფს, რომელთანაც ჩვენ ვართ ღია კონფლიქტში, ჰყავს თავისი მხარდამჭერები და ლობისტები, რომელზეც საზოგადოებაში არის საუბრები და თავადაც ამჟღავნებენ სიმპათიებს ამ ჯგუფის მიმართ", — თქვა ბესელიამ.

ბოლო რამდენიმე დღეა ინტერნეტში ეკა ბესელიას პირადი ცხოვრების ამსახველი კადრები ვრცელდება. ორივე შემთხვევაში დეპუტატმა საჯაროდ თქვა, რომ ეს ვიდეომასალა მას ფარულად გადაიღეს. ვიდეომასალის გავრცელებას წინ უსწრებდა ბესელიას დაპირისპირება იმ 10-კაციან სიასთან, რომელიც უზენაეს სასამართლოში უვადო მოსამართლეებად უნდა გამწესებულიყო. ამ სიასთან პრობლემა ჰქონდა არასამთავრობო ორგანიზაციებსაც და მათ ნაწილს "ჩინჩალაძე-მურუსიძის კლანად" მოიხსენიებდა.