პარლამენტის თავმჯდომარე ირაკლი კობახიძე აცხადებს, რომ მმართველი პარტიის დეპუტატის, ეკა ბესელიას პირადი ცხოვრების ამსახველი კადრების გასაჯაროების გამოძიებას ბოლომდე მიყვება. მისი თქმით, პირადი ცხოვრების ამსახველი ნებისმიერი ინფორმაციის გავრცელება ამორალურია.

"მე მქონდა პირადი კომუნიკაცია სამართალდამცავი უწყებების წარმომადგენლებთან და კიდევ ერთხელ მოვუწოდებ, მაქსიმალურად ჩაყვნენ ამ საქმეს და გამოიკვლიონ თუ რასთან გვაქვს რეალურად შეხება. მითუმეტეს საქმე ეხება პარლამენტის წევრს, აქედან გამომდინარე, ბოლომდე მე პირადად ჩავყვები ამ საქმეს", — განაცხადა კობახიძემ.

კადრების გავრცელებას გამოეხმაურა თავად ეკა ბესელიაც. უმრავლესობის დეპუტატმა აღნიშნა, რომ მის წინააღმდეგ მორალური ტერორი მიმდინარეობს და მოუწოდა ქალებს აქტიურად მოვიდნენ პოლიტიკაში რეალობის შესაცვლელად.

"ამდენის გავლა და გადატანა არ დასჭირდეს არც ერთ ქალს, მეტნი მოდით პოლიტიკაში და იბრძოლეთ, რომ იყოს უფრო ადამიანური და კეთილი, ვიდრე არის დღეს", — აღნიშნავს ბესელია.

ქალთა მოძრაობაში კი განაცხადეს, რომ საქართველოში სექსი ქალთა პოლიტიკიდან განდევნის იარაღია. მათი თქმით, სექსუალური ცხოვრებით მანიპულირება, ან მისი გასაჯაროება ქალების პოლიტიკიდან განდევნის, მათი მორალური დისკრედიტაციისა და სრული მარგინზალიზაციის ყველაზე სასტიკი მეთოდია.

28 იანვარს სოციალურ ქსელებში პოლიტიკოსის პირადი ცხოვრების ამსახველი კადრების გავრცელების შესახებ ინფორმაცია დეპუტატ დავით ჭიჭინაძისგან გახდა ცნობილი. შინაგან საქმეთა სამინისტროს ინფორმაციით, პოლიტიკოსის საჯარო განცხადების საფუძველზე კანონით დადგენილ ფარგლებში სამართლებრივ რეაგირებას მოახდენენ.

ეს პირველი შემთხვევა არაა, როცა ინტერნეტში პოლიტიკოსი ქალების პირადი ცხოვრების ამსახველი კადრების გავრცელებაზეა საუბარი. 2016 წლის 11 მარტში ერთ-ერთი პოლიტიკური პარტიის ლიდერისა და ყოფილი მინისტრის პირადი ცხოვრების ამსახველი მასალა გავრცელდა. მალევე, 14 მარტს მუქარის შემცველი ვიდეოკადრები გავრცელდა. ვიდეომასალა მოქმედი ჟურნალისტებისა და პოლიტიკოსების მიმართ ჩანაწერების გავრცელების მუქარას შეიცავდა, თუ ისინი არ დატოვებდნენ თანამდებობებს.