ქუთაისის სააპელაციო სასამართლოს თავმჯდომარე, დიმიტრი გვრიტიშვილი ქართული ოცნების დეპუტატის ეკა ბესელიას ღია წერილს პასუხობს. ეკა ბესელია განცხადებაში, რომელიც მისი პირადი ცხოვრების ამსახველი კადრების გავრცელებას ეხება, წერს, რომ "სასამართლოში გარკვეული ჯგუფი ძალაუფლების ხელში ჩაგდებას ცდილობს".

დიმიტრი გვრიტიშვილის თქმით, ფარული ჩანაწერების გავრცელების სასამართლოზე გადაბრალება სამარცხვინო პოზიციაა.

"ეს ფაქტი, თვითონ ამ ჩანაწერების გავრცელების, რაღაც საეჭვოდ დაემთხვა ბოლო პოლიტიკურ პროცესებს, როდესაც გარკვეულმა ჯგუფმა, ეკა ბესელიას ხელმძღვანელობით, მოინდომა რაღაც წამებულის მანტიის მოსხმა, თავისი ნიშნის დამკვიდრება პოლიტიკაში და ეს რატომღაც დაუკავშირდა მოსამართლეების თემას. არადა, იყო ინფორმაციები, რომ ქალბატონი ეკა ბესელია უნდა გადამდგარიყო მანამდეც", — განაცხადა გვრიტიშვილმა ტოკ-შოუ არჩევანში.

მან ეკა ბესელია ტყუილში დაადანაშაულა. გვრიტიშვილის თქმით, სიმართლეს არ შეესაბამება ეკა ბესელიას მიერ გავრცელებული ინფორმაცია, რომ ფარული ჩანაწერების შესახებ საქმე სააპელაციო სასამართლოშია.

"ვიმყოფებოდი სააპელაციოში, რომ გამერკვია ამ საქმის მოძრაობა. 10 დეკემბრიდან ეს საქმე უზენაეს სასამართლოშია. ჩანაწერების გავრცელების შემდეგ ეკა ბესელია ამბობს, რომ საქმე არის სააპელაციოში. ეს ტყუილია, საქმე არის უზენაეს სასამართლოში. სააპელაციო სასამართლოში საქმის მტკიცებულებები არ გახსნილა და არ არსებობს თეორიული შანსი, რომ ეს ჩანაწერები სასამართლოდან ვინმეს გაევრცელებინა", — განაცხადა დიმიტრი გვრიტიშვილმა.

მისივე თქმით, ეკა ბესელიას "შექმნილი სიტუაცია ხელს აძლევს". კითხვაზე, ნიშნავს თუ არა ეს, რომ ჩანაწერის გავრცელება ეკა ბესელიას აწყობდა და თავად მოაწყო, გვრიტიშვილი პასუხობს, რომ "არ იცის, თუმცა, ზოგადად, არაფრის გამორიცხვა არ შეიძლება".