ქართველი მეცო სოპრანოს, ანიტა რაჭველიშვილის სადებიუტო სოლო ალბომი Anita 2018 წლის Opera Awards-ის საუკეთესო სოლო ალბომების ნომინაციაში მოხვდა. ამის შესახებ ინფორმაციას კონკურსის ოფიციალურ საიტზე ვკითხულობთ.

Opera Awards 2012 წელს დაარსდა და ის საოპერო სამყაროში ერთ-ერთ ყველაზე პრესტიჟულ ღონისძიებად ითვლება. ნომინაციებში გამარჯვებულებს 2019 წლის 19 აპრილს, ლონდონში, ინგლისის ეროვნულ ოპერაში გამოაცხადებენ. ანიტა აღნიშნულ კონკურსზე 2017 წელსაც იყო წარდგენილი.

ანიტა რაჭველიშვილის სადებიუტო ალბომის ყდა.

ფოტო: Sony Classical

ანიტა რაჭველიშვილის პირველი ალბომი 2018 წლის გაზაფხულზე გამოვიდა. მასში სულ 12 სიმღერაა შესული, მათ შორისაა დიმიტრი არაყიშვილის ოპერა "ლეგენდა შოთა რუსთაველზე - თამარ მეფის არია".

"თამარ მეფე დღევანდელი ქართველი ქალის მაგალითია. მიხარია, რომ ეს სიმღერა ჩემს სადებიუტო ალბომშია, რადგან თავს ძლიერ და წარმატებულ ქალად მივიჩნევ. სხვა თუ არაფერი, ვცდილობ, რომ ვიყო" - ამბობდა ანიტა ალბომის დაანონსებისას.

ქართველმა მეცო-სოპრანომ ალბომი ამერიკულ ხმის ჩამწერი კომპანია Sony Classical-თან ჩაწერა.