საია ქობულეთის 81-ე საოლქო საარჩევნო კომისიას ლეონიდ ჩერნოვეცკის მაჟორიტარობის კანდიდატობის რეგისტრაციის კანონიერების შესწავლის თხოვნით მიმართავს:

"ლეონიდ ჩერნოვეცკისთან დაკავშირებით ინტერნეტ სივრცეში გავრცელებულია არაერთი ვიდეო სიუჟეტი, სადაც ნათლად ჩანს, რომ მაჟორიტარობის კანდიდატი ჟურნალისტებს ინტერვიუს აძლევს რუსულ ენაზე. გამომდინარე აქედან, გვაქვს საფუძვლიანი ეჭვი, ვივარაუდოთ, რომ ლეონიდ ჩერნოვეცკი ვერ ფლობს ქართულ ენას, რაც გამორიცხავდა მის რეგისტრაციას მაჟორიტარობის კანდიდატად. როგორც ჩვენთვის ცნობილია, ლეონიდ ჩერნოვეცკის მიერ ქართული ენის ფლობის ფაქტი არ გადაუმოწმებია საოლქო საარჩევნო კომისიის თავმჯდომარესაც".

საია განმარტავს, რომ ყოველივე ზემოაღნიშნულიდან გამომდინარე, საოლქო საარჩევნო კომისიას მიმართავს, დაიწყოს ადმინისტრაციული საქმის წარმოება ქობულეთის 81-ე საოლქო საარჩევნო კომისიის თავმჯდომარის 2016 წლის 27 აგვისტოს N07/2016 განკარგულების კანონიერების შესწავლის მიზნით და განცხადებაში მოყვანილი ფაქტობრივი გარემოებების დადასტურების შემთხვევაში მიიღოს შესაბამისი გადაწყვეტილება.

30 აგვისტოს წარმოშობით უკრაინელმა მილიარდერმა, ლეონიდ ჩერნოვეცკიმ, რომელიც ქობულეთში უკვე 5 წელია ცხოვრობს, განაცხადა, რომ 8 ოქტომბრის საპარლამენტო არჩევნებზე საქართველოს პარლამენტის მანდატის მოსაპოვებლად ქობულეთის მაჟორიტარულ ოლქში იბრძოლებს.