წარმოშობით უკრაინელი მილიარდერი ლეონიდ ჩერნოვეცკი, რომელიც ქობულეთში უკვე 5 წელია ცხოვრობს, აცხადებს, რომ 8 ოქტომბრის საპარლამენტო არჩევნებზე საქართველოს პარლამენტის მანდატის მოსაპოვებლად ქობულეთის მაჟორიტარულ ოლქში იბრძოლებს. ამის შესახებ განცხადება ბიზნესმენმა ფეისბუკზე, თავის ოფიციალურ გვერდზე გამოაქვეყნა:

"გადავწყვიტე, საპარლამენტო არჩევნებზე, ქობულეთის ოლქში დეპუტატობის მაჟორიტარ კანდიდატად წარვდგე! თუმცა, პოლიტიკურ პარტიაზე უარი არ მითქვამს და არც არასდროს ვიტყვი! პარტია აუცილებლად იარსებებს და ის ქართველი ხალხის საკეთილდღეოდ იმუშავებს! მიუხედავად ყველაფრისა, იმ კანონპროექტებს, რომელთა შესახებაც ბევრი გესაუბრეთ და რომლებისთვისაც ხელმოწერებს ვაგროვებდით, პარლამენტში მაინც გავატარებთ. მაგრამ, ამ საპარლამენტო არჩევნებში პარტიის წარდგენა ვერ გადავწყვიტე, რადგან უმაღლესი იურიდიული განათლების მქონე ისეთი ათი კანდიდატიც კი ვერ ვიპოვე, რომლებიც საქართველოს კანონების შეცვლასა და მათ გაუმჯობესებას შეძლებდნენ. ქართველების ცხოვრების უკეთესობისკენ შეცვლის ჩემს მისწრაფებას ათასობით ადამიანმა დაუჭირა მხარი, მაგრამ უმრავლესობა გამოუცდელი ადამიანები არიან, ამ საქმეს კი პროფესიონალები სჭირდება. აქედან გამომდინარე, პარტია საქმიანობას მომავალში განაგრძობს და ჩვენ დეპუტატობის კანდიდატების საუკეთესო კადრების შერჩევას გავაგრძელებთ".

ჩერნოვეცკის თქმით, მან ქობულეთელთა პრობლემების შესახებ "ყველაფერი" იცის და ნაცნობია ყველა პრობლემა - დაწყებული სიღარიბით, დამთავრებული მოუწესრიგებელი ინფრასტრუქტურითა და უმუშევრობით:

"მე მჯერა უფლისა და თქვენი თანადგომის, რადგან მხოლოდ ჩემი ხალხის, ჩემი თანაქალაქელების კეთილდღეობა და ბედნიერება მსურს!"

ლეონიდ ჩერნოვეცკიმ რამდენიმე თვის წინ პარტია ბედნიერი საქართველოსთვის დააფუძნა, თუმცა, მიმდინარე წლის მაისში განაცხადა, რომ პოლიტიკურ საქმიანობას წყვეტდა. მაშინ ბიზნესმენს ამის მიზეზი არ დაუსახელებია.