საქართველოს კონკურენციის სააგენტოს ცნობით, სასტუმროების ონლაინ დაჯავშნის პლატფორმებმა, Booking.com-მა, Ostrovok.ru-მა, hrs.com-მა და booking24.ge-მ კონკურენციის შესახებ კანონი დაარღვია. On.ge-ს სააგენტოს პრესსამსახურში განუცხადეს, რომ დარღვევა უკვე აღმოფხვრილია.

კონკურენციის სააგენტოს განმარტებით, სასტუმროებსა და სასტუმროების დაჯავშნის ონლაინ პლატფორმებს შორის დადებულ ხელშეკრულებებში, ფართო MFN პირობების ანუ საუკეთესო ფასის გარანტიის გამოყენება საქართველოს კონკურენციის კანონმდებლობას ეწინააღმდეგებოდა. ეს ნიშნავს, რომ ასეთი კონტრაქტებით ონლაინდაჯავშნის პლატფორმებზე სასტუმროები უფრო ხელმისაწვდომ ფასს ადებდნენ თავიანთ მომსახურებას.

პრობლემის მოსაგვარებლად, კონკურენციის სააგენტოს ცნობით, სასტუმროებთან დადებულ ხელშეკრულებებში კონკურენციის შემზღუდველი დებულებები შეასწორეს და ფართო MFN პირობები ვიწრო MFN პირობებით ჩაანაცვლეს.

სააგენტო განმარტავს, რომ ოთხივე სასტუმროების ონლაინდაჯავშნის პლატფორმამ კონკურენციის კანონმდებლობის საწინააღმდეგო MFN პირობები მონიტორინგის პროცესშივე შეცვალა ან ამოიღო.

"ერთ-ერთმა ეკონომიკურმა აგენტმა MFN პირობებთან დაკავშირებით, გერმანიაში, ავსტრიაში, იტალიასა და პოლონეთში არსებულ სასტუმროებთან დადებული ხელშეკრულებების მსგავსად, გამონაკლისი დაუშვა საქართველოშიც. დანარჩენი ეკონომიკური აგენტების მხრიდან, MFN პირობებთან დაკავშირებით, კონკურენციის კანონმდებლობის საწინააღმდეგო სახელშეკრულებო დათქმებს ადგილი არ ჰქონია", — ნათქვამია განცხადებაში.