ამ დროისთვის მხოლოდ ამერიკაში 5 მილიონზე მეტ ადამიანს ალცჰაიმერი აქვს. ყოველ 68 წამში ის ახალ ადამიანს უვითარდება. მეცნიერები ელიან, რომ 2050 წლისთვის ამ ნეიროდეგენერაციული დაავადების მქონე პაციენტების რიცხვი გასამმაგდება.

CNN-ის ცნობით, ამ დროისთვის, აშშ-ში ალცჰაიმერი იმ სასიკვდილო დაავადებათა ათეულში მეექვსე ადგილს იკავებს, რომელიც ჯერჯერობით არ იკურნება.

ამის მიუხედავად, ექსპერტები თანხმდებიან, რომ დაავადების ადრეული დიაგნოსტიკა ალცჰაიმერის რისკის ქვეშ მყოფ პაციენტებს მეტ დროს აძლევს ცხოვრების ძველი რიტმის შესანარჩუნებლად და მაშინაც კი, როცა დაავადება პროგრესირებს, მისი სიმპტომები ნაკლებად რთულად გადასატანი ხდება.

"ალცჰაიმერის ადრეულ ეტაპზე გამოვლენა უმჯობესია როგორც პაციენტებისთვის, ისე ჩვენთვის, რადგან ამით შესაძლებლობა გვექმნება მისი მკურნალობა დავგეგმოთ და პროცესი მედიცინისთვის უფრო ეფექტიანი გავხადოთ" - ამბობს კალიფორნიაში სიდარ-საინის სამედიცინო ცენტრის ხელმძღვანელი კეიზ ბლეიკი.

ალცჰაიმერის ასოციაციის საერთაშორისო კონფერენციაზე ექსპერტებმა განაცხადეს, რომ ადამიანები ხშირად მიმართავენ თვითდიაგნოზირების მეთოდს. მათ შეისწავლეს 16 პოპულარული ონლაინ-ტესტი, აღმოჩნდა, რომ არცერთი მათგანი იყო ვალიდური და ჰქონდა სუსტი ეთიკური აგებულება.

"საკუთარი თავისთვის დიაგნოზის დასმა ონლაინ საკმაოდ პოპულარული, მზარდი ტენდენციაა. უამრავი ქუიზი შეგხვდებათ, რომლებიც ალცჰაიმერის დიაგნოზის დადგენას შემოგთავაზებთ, თუმცა ჩვენ რაც მათგან გავიგეთ, გულწრფელად რომ გითხრათ, ისაა, რომ ისინი საშიში და ზიანის მომტანია" - განაცხადა ჯული რობილარდმა, რომელმაც რამდენიმე დღის წინ ბოსტონში გამართულ კონფერენციაზე აღნიშნული კვლევა წარმოადგინა.

რობილარდის თქმით, მსოფლიო მასშტაბით მშობლებისთვის შექმნილი საიტები აპიარებენ ტესტებს, რომლებიც არასწორ შედეგებს აჩვენებს, მათი ვიზიტორების სტატისტიკა კი ყოველ თვეში 8,8 მილიონს აჭარბებს.

ამავე კონფერენციაზე, სხვა მკვლევარმა წარმოადგინა თავისი ნამუშევარი, რომელიც აჩვენებს, რომ ალცჰაიმერის არასწორი დიაგნოსტიკა იმ პაციენტებში, რომლებიც სინამდვილეში დემენციის ან პარკინსონის დაავადების მატარებლები არიან, მკურნალობას საჭიროზე ძვირს ხდის. Analysis Group, Inc.-სა და Eli Lilly and Co.-ს კვლევით, მცდარი მკურნალობა ამერიკელი პაციენტს წელიწადში 14 ათასი აშშ დოლარი უჯდება.

ალცჰაიმერის ასოციაცია ურჩევს იმ ადამიანებს, რომლებსაც ეჭვი აქვთ, რომ მათ მეგობარს ან ოჯახის წევრს შესაძლოა ეს დაავადება უვითარდებოდეს, ყურადღება მიაქციონ შემდეგ ათ ნიშანს:

1. მეხსიერების ცვლილებები, რომლებიც ყოველდღიური ცხოვრების ტემპს მნიშვნელოვნად არღვევს;
2. რთული გამოწვევების წარმოდგენა მარტივი პრობლემების გადაჭრის დროს;
3. მარტივი დავალებების შესრულების უნარის დაქვეითება შინ, სამსახურში ან თავისუფალ დროს;
4. დაბნეულობის განცდა დროსთან და ადგილთან მიმართებაში;
5. პრობლემები სივრცითი განლაგებების და ვიზუალური გარემოს აღქმაში;
6. პრობლემები სიტყვებთან საუბრის ან წერის დროს;
7. ნივთების არასწორ ადგილას განლაგება და საკუთარი ნაბიჯების დავიწყება ან არევა;
8. მსჯელობის უნარის შემცირება ან გაუარესება;
9. მუშაობის ან სოციალური აქტიურობის მინიმუმამდე შემცირება;
10. განწყობის ან პიროვნული ნიშნების ძლიერი ცვლილება.

ექიმთან კონსულტირება და დროული დიაგნოზი ალცჰაიმერით დაავადებულს და მის საყვარელ ადამიანებს ერთად გასატარებლად მეტ სრულფასოვან დროს აძლევს.