კვირას, 27 იანვარს, ფორმულა კრეატივის სერიალის ჩემი ცოლის დაქალების მეთოთხმეტე სეზონი დასრულდა, თუმცა სერიალის სიუჟეტის განხილვა ჯერ კიდევ გრძელდება. ქეთის და ზაზას გარშემო განვითარებულ მოვლენებზე კომენტარები, სტატუსები თუ მიმები ჯერ კიდევ არ წყდება, როგორც სერიალის ოფიციალურ გვერდზე, ისე მომხმარებლების კედლებზე.

[ფრთხილად, წინ სპოილერებია]

სერიალის გმირების, ზაზასა და ქეთის სიუჟეტური ხაზის განვითარებით, რა თქმა უნდა, ყველა კმაყოფილი არ დარჩენილა. ზოგი ზაზასგან ღალატზე ტრადიციულ ძალადობრივ რეაგირებას ელოდა, სხვების აზრით კი, სერიალში კარგად არ ჩანდა მიზეზები, რის გამოც ქალმა შეიძლება ქმარს უღალატოს.

ამ თემებზე გადაცემაში შუადღე მესამეზე სერიალის პროდიუსერმა, ირაკლი საღინაძემ და ზაზას როლის შემსრულებელმა გიორგი ბოჭორიშვილმა ისაუბრეს.

"საავტორო პოზიცია შეიძლება რამე აქსიომატურ თემებზე იყოს დაფიქსირებული. ის, რომ ძალადობა ცუდია, არის აქსიომატური ნაწილი. ეგ თვალსაჩინოდ ჩანდა, როგორც საავტორო პოზიცია. საზოგადოება შეთანხმებული ვართ, რომ არა-კაც-ვკლათ", - ამბობს საღინაძე.

როგორც აღმოჩნდა, სერიალის შემქმნელები განსხვავებულად ხედავენ ზაზას ბოლო მესიჯსაც, რომელშიც მან ქეთის ჰკითხა, ის უფრო უყვარდა თუ კაცი, რომელთანაც რომანი ჰქონდა:

"ალბათ, რაღაც არასწორად გავაკეთეთ. ჩემთვის ზაზას ბოლო მესიჯი კომპლექსების გამოხატულება უფროა, მან შედარების ფორმატში და კონკურენციის პირობებში დაინახა თავისი თავი და ამ მესიჯის მიწერა მას თავისმა კომპლექსებმა აიძულა. თუმცა, მის ინტერესში, რომ გაიგოს [ქეთის] აზრი, რომელიც შეიძლება გამოდგეს შემფასებლად, მისი, როგორც კონკურენტული მამრის, შეიძლება დავინახოთ შერიგების სურვილი".

ჩემი ცოლის დაქალების მიმართ ხშირად არსებობს საზოგადოებრივი დაკვეთა, გმირებმა მაგალითი მისცენ მაყურებლებს, რაც, უმეტესად, სერიალის პოპულარობითაა გამოწვეული.

ირაკლი საღინაძემ იმაზეც ისაუბრა, თუ სად გადის ზღვარი მხატვრულ რეალობასა და სამოქალაქო პოზიციას შორის:

"მინდა მაყურებელმა ერთ რამეზე დაგვიჯეროს. არც ერთი სიტუაცია, არც ერთი კითხვის ნიშანი, რომელიც ამ სერიაში ისმევა, არაა მიმართული იმაზე, რომ ვინმეს რამე ასწავლოს. ეს არ არის სასწავლებელი, ჩვენ გვინდა, რომ ერთად ვიფიქროთ და გამოწვეული დისკუსიით რაღაც დასკვნები გავაკეთოთ".

სერიალი ახალი სეზონით, სავარაუდოდ, მარტში დაბრუნდება.