სკოტლანდ იარდის მიერ ინტერპოლით ძებნილი ჯეკ შეფარდის დაკავებისთვის ბრიტანეთი საქართველოს შინაგან საქმეთა სამინისტროს უხდის მადლობას, თუმცა ის პოლიციას თავად ჩაბარდა.

შეფერდს, რომელიც თბილისში, სავარაუდოდ, მარტიდან იმალებოდა საქართველოს შინაგან საქმეთა სამინისტროც ეძებდა. რუსთავი 2-ის ინფორმაციით, ის პოლიციაზე ადრე აღმოაჩინეს. ტელევიზიასთან ინტერვიუში შეფერდმა განაცხადა, რომ გამოძიებასთან თანამშრომლობას აპირებს ამიტომ საკუთარი სურვილით, ადვოკატებთან ერთად ვაკე-საბურთალოს განყოფილებაში მივიდა და პოლიციას ჩაბარდა.

შინაგან საქმეთა სამინისტროში განაცხადეს, რომ მიმდინარეობს შეფერდის წინასაექსტრადიციო პროცესი.

23 იანვარს BBC-მ გაავრცელა ინფორმაცია, რომ შეფერდი ქალის არაგანზრახ მკვლელობაში იყო ბრალდებული და თბილისში იმალებოდა. გამოცემა წერდა, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი დაიღუპა.

შეფერდი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, შეფერდმა პასუხი აგოს.