არაგანზრახ მკვლელობისთვის ინტერპოლის მიერ ძებნილი ჯეკ შეფერდი აცხადებს, რომ საქართველოში მაშინ შემოვიდა, როცა პირობითი მსჯავრი ჰქონდა და არ იძებნებოდა. მისი თქმით, საქართველოს კანონიერად დატოვება შეეძლო, მაგრამ დაიმალა, რადგან გარდაცვლილი ქალის მამა გამოძიებაზე ზემოქმედებას ახდენს და ამის ეშინოდა.

რუსთავი 2-თან ექსკლუზიურ ინტერვიუში შეფერდი ამბობსს, რომ გარდაცვლილის მამა პენიტენციურ სისტემაში მუშაობს და დაემუქრა, რომ მას ციხეში ცუდი დღეები ელოდა. შეფერდი ბრალდებას არ აღიარებს და აცხადებს, რომ იმ ავარიის დროს, როცა ახალგაზრდა ქალი გარდაიცვალა ნავს თავად არ მართავდა და ეს სასამართლომაც დაადგინა. შეფერდი უარყოფს იმასაც, რომ ინციდენტის დროს ნასვამი იყო.

შეფერდი პოლიციას თავად ჩაბარდა. შინაგან საქმეთა სამინისტროში აცხადებენ, რომ მიმდინარეობს წინასაექსტრადიციო სამუშაოები.

დღეს, 23 იანვარს BBC-მ გაავრცელა ინფორმაცია, რომ ჯეკ შეფერდი მარტიდან თბილისში იმალებოდა. გამოცემა წერდა, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი დაიღუპა.

კაცი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, ჯეკ შეფერდმა მისი ქმედებებისთვის პასუხი აგოს.