კაცი, რომელიც ლონდონში ქალის მკვლელობისთვის გაასამართლეს, მარტიდან თბილისში იმალება. ამის შესახებ BBC წერს. მათი ინფორმაციით, არსებობს ჩანაწერი, რომელიც ადასტურებს, რომ ჯეკ შეფერდი თბილისშია.

გამოცემა წერს, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი, დაიღუპა.

კაცი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, ჯეკ შეფერდმა მისი ქმედებებისთვის პასუხი აგოს.

საქართველოს შინაგან საქმეთა სამინისტროში On.ge-ს უთხრეს, რომ ამ საქმესთან დაკავშირებით, ბრიტანელ სამართალდამცველებთან აქტიური თანამშრომლობა მიმდინარეობს.

"ქართველ და ინგლისელ სამართალდამცველებს შორის მიმდინარეობს აქტიური თანამშრომლობა, იმისათვის, რომ მოხდეს აღნიშნული პირის საქართველოში იდენტიფიცირება და შემდგომ შესაბამისი სამართლებრივი ღონისძიებების გატარება", — ამბობენ უწყებაში.