ფინანსთა მინისტრის მოადგილის გიორგი კაკაურიძის განცხადებით, პარლამენტის წევრების ხელფასების ზრდა 2027 წლის ბიუჯეტში გათვალისწინებული არაა, თუმცა, კანონი ითხოვს.

ამის შესახებ კითხვა პარლამენტის დიასპორის, კულტურისა და სპორტის კომიტეტების ერთობლივ სხდომაზე, სადაც მომავალი წლის ბიუჯეტზე მსჯელობდნენ, "ოცნების" დეპუტატმა და დიასპორის კომიტეტის ხელმძღვანელმა ირაკლი ზარქუამ დასვა.

ირაკლი ზარქუა: რადიკალურ ტელევიზიებში და მედიაში და მათ შორის რადიკალებშიც გავრცელდა ნარატივი, რომ ბიუჯეტი იზრდება და საქართველოს პარლამენტის დეპუტატებს ეზრდებათ ხელფასი. მე მინდა თქვენ უპასუხოთ კითხვას, გვეზრდება ხელფასი? 1200, 1500 და რაღაც სიგიჟეებს ყვებოდნენ.... გვეზრდება ხელფასი პარლამენტის წევრებს თუ არა? ეს მკაფიოდ მინდა რომ აქ ბრძანოთ.

გიორგი კაკაურიძე: დღეს მოქმედი კანონმდებლობით, პარლამენტის წევრის ხელფასი დაკავშირებულია საბაზო თანამდებობრივ სარგოსთან. საბაზო თანამდებობრივი სარგოს გაზრდასთან ერთად უნდა გაიზარდოს პარლამენტის ხელფასიც, მაგრამ ამავდროულად ისიც უნდა ითქვას, რომ დღეს პარლამენტის ბიუჯეტი რაც არის დამტკიცებული, იქ არ არის პარლამენტარების ხელფასების ზრდა გათვალისწინებული. ანუ გათვალისწინებული არ არის ბიუჯეტში, კანონი ითხოვს, რომ უნდა გაიზარდოს, ამიტომ კანონი იქნება შესაცვლელი ან უნდა დავამატოთ ფული, ეგ იქნება საბოლოო ჯამში.

ცნობისთვის, კანონის თანახმად, 2027 წელს პარლამენტის წევრთა ხელფასები 1080 ლარით უნდა გაიზარდოს და წლიურად 166 560 ლარს უნდა მიაღწიოს. კერძოდ, საქართველოში თანამდებობის პირთა ხელფასები მიბმულია საჯარო სამსახურის საბაზო ანაზღაურებაზე. 2026 წელს საბაზო ხელფასი თვეში 1 600 ლარს შეადგენდა, ხოლო 2027 წლიდან ის 1 735 ლარამდე გაიზრდება. აღნიშნული საბაზო მაჩვენებელი მრავლდება კონკრეტული თანამდებობისთვის განსაზღვრულ კოეფიციენტზე, რის შედეგადაც ავტომატურად იზრდება როგორც რიგითი საჯარო მოხელეების, ისე პოლიტიკური თანამდებობის პირების ანაზღაურება.

2027 წლის ბიუჯეტის თანახმად, პარლამენტის შრომის ანაზღაურების ხარჯები 45,8 მლნ ლარზეა გათვლილი, მაშინ როცა მიმდინარე წლის გეგმით, 46,2 მლნ ლარია.