ინტერპოლით ძებნილმა, ქალის არაგანზრახ მკვლელობისთვის გასამართლებულმა, პირმა ჯეკ შეფერდიმ ტელეკომპანია რუსთავი 2-ს ინტერვიუს მისცა და პოლიციას ჩაბარდა. როგორც შინაგან საქმეთა სამინისტროში On.ge-ს განუცხადეს, ახლა [8 საათის მონაცემები] მისი, როგორც ძებნილის, დაკავების პროცედურა მიმდინარეობს.

ინტერპოლით ძებნილი პირის პოვნის შესახებ ინფორმაცია ტელეკომპანია რუსთავი 2-მა გაავრცელა. არხი აცხადებდა, რომ ძებნილი პირის პოვნა პოლიციას დაასწრო, რის დასადასტურებლადაც ჟურნალისტისა და ამ პირის საერთო ფოტო გაავრცელა.

დღეს, 23 იანვარს BBC-მ გაავრცელა ინფორმაცია, რომ ჯეკ შეფერდი მარტიდან თბილისში იმალებოდა. გამოცემა წერდა, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი დაიღუპა.

კაცი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, ჯეკ შეფერდმა მისი ქმედებებისთვის პასუხი აგოს.