ჭიდაობის ფედერაციის პრეზიდენტის, გეგა გეგეშიძის დაკავების გასაპროტესტებლად ეროვნული ნაკრების მოჭიდავეთა ნაწილმა წვრთნები შეწყვიტა. ამის შესახებ ეროვნული ნაკრების ბერძნულ-რომაული სტილით მოჭიდავეთა ნაკრების მთავარმა მწვრთნელმა, ბექა როყვამ განაცხადა.

ჭიდაობაში მსოფლიო ჩემპიონი ზურაბ იაკობაშვილი კი აცხადებს, რომ ვარჯიშებს მაშინ გააგრძელებენ, როცა გეგეშიძის გაათავისუფლებენ და თანამდებობაზე დააბრუნებენ.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს.

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

მოჭიდავეთა ნაწილმა გეგეშიძის მხარდასაჭერად აქცია გამართა. 2012 წლის ლონდონის ოლიმპიური თამაშების ვერცხლის პრიზიორმა, ევროპის 3-გზის და მსოფლიოს ჩემპიონმა, ლადო ხინჩეგაშვილმა თქვა, რომ ჭიდაობაც ძალადობაა.

მოჭიდავეები აცხადებდნენ, რომ ეს საკითხი ჭიდაობის ოჯახში უნდა გადაწვეყტილიყო. მათ პასუხად დაზარალებულმა სპორტსმენმა განაცხადა, რომ ისეთი ოჯახის არ წამს, რომელიც გასაჭირის დროს ერთ წევრს გარიყავს, ხოლო მეორეს მხოლოდ იმიტომ დაუდგება გვერდით, რომ მას ძალაუფლება აქვს.