ევროპის ჩემპიონი, ზურაბ დათუნაშვილი ფედერაციის დაკავებული პრეზიდენტის, გეგა გეგეშიძის მხარდამჭერ მოჭიდავეებზე საუბრისას ამბობს, რომ მას არ სწამს ისეთი ოჯახის, რომელიც გასაჭირის დროს ერთ წევრს გარიყავს, ხოლო მეორეს მხოლოდ იმიტომ დაუდგება გვერდით, რომ მას ძალაუფლება აქვს.

"მე ასეთ ოჯახში არ ვარ გაზრდილი და ეს არაა ოჯახი", — ამბობს დათუნაშვილი რუსთავი 2-თან.

მისივე თქმით, ის არ ითხოვდა, რომ ფედერაციის პრეზიდენტი დაეჭირათ. მას მხოლოდ სურდა, რომ გეგეშიძეს თანამდებობა დაეტოვებინა.

"მე უბრალოდ ვიტყოდი იმას, რომ პრეზიდენტის მოვალეობის შემსრულებელს არ აქვს უფლება, რომ თავში ვიღაცას ჩაარტყას. ამის გამო უნდა გადამდგარიყო [გეგა გეგეშიძე] თანამდებობიდან. ჩემი მოთხოვნა ეს იყო და ეს არის დღესაც", — აღნიშნავს ევროპის ჩემპიონი.

დღეს, 23 იანვარს ჭიდაობის ფედერაციასთან მოჭიდავეთა ნაწილმა გეგა გეგეშიძის პატიმრობიდან გათავისუფლების მოთხოვნით აქცია გამართა.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს.

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ამავე თემაზე: