2012 წლის ლონდონის ოლიმპიური თამაშების ვერცხლის პრიზიორმა, ევროპის 3-გზის და მსოფლიოს ჩემპიონმა, ლადო ხინჩეგაშვილმა ჭიდაობის ფედერაციის პრეზიდენტის, გეგა გეგეშიძის მხარდამჭერ აქციაზე თქვა, რომ ჭიდაობაც ძალადობაა. გეგა გეგეშიძე ძალადობის ბრალდებით 22 იანვარს დააკავეს.

"რომ ვეჭიდავები სპორტსმენს, ვძალადობ, ძალის გამოყენების გარეშე მე იმას ქულას ვერ ავუღებ", — ამბობს ხინჩეგაშვილი.

მისი თქმით, რაც ხდება, გაუგებრობაა და ეს გაუგებრობა რაც მალე მორჩება, სპორტისთვის უკეთესი იქნება.

"ყველაფერი ხდება. ხშირად მომხდარა ასეთი სიტუაციები და ასეთი ფორმა არასდროს არ მიუღია. დღეს რომ აქ ვდგავართ და ეს მოხდა, ძალიან საწყენი და სამარცხვინოა. ფედერაციაც მოჭიდავეა და მოჭიდავეც მოჭიდავეა. იმ ფედერაციაში ვინც არიან თანამდებობის პირები, ისინიც მოჭიდავეები არიან. მამასა და შვილს შორის ხდება კონფლიქტი, მაგრამ აქამდე არ უნდა მივიდეს", — აღნიშნავს მსოფლიო ჩემპიონი.

ხინჩეგაშვილი მონაწილეობდა კამპანიაში "ძლიერები არ ძალადობენ", რომლის ფარგლებშიც სპორტსმენები სკოლის მოსწავლეებს ბულინგსა და ძალადობის შესახებ ესაუბრებიან.

"სპორტსმენი არასდროს ძალადობს. სპორტსმენი ძლიერია, მაგრამ არავის ჩაგრავს, რადგან ის სწორადაა აღზრდილი" — ამბობდა ხინჩეგაშვილი ვიდეოში, რომლითაც ამ კამპანიაში ჩაერთო.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს.

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.