ცხოველთა მონიტორინგის სააგენტოს მაშველებმა, ელიავას ბაზრობის მიმდებარე ტერიტორიაზე, მდინარე მტკვარში ჩავარდნილი ჰასკი ამოიყვანეს.

"როგორც ჩანს, ძაღლმა მდინარის დამშრალ ნაპირამდე მიაღწია, ან ის დინებამ გამორიყა", - წერს სააგენტო.

უწყების ინფორმაციით, მაშველებმა ის რამდენიმე წუთში ამოიყვანეს და თავშესაფარში გადაიყვანეს, სადაც მას ჯანმრთელობის მდგომარეობის შემოწმების მიზნით, ლაბორატორიული კვლევები ჩაუტარდა:

"გადარჩენილი ჰასკი თავს კარგად გრძნობს და პატრონს თავშესაფარში ელოდება".

გავრცელებული განცხადების მიხედვით, ძაღლი იდენტიფიცირებული არაა და პატრონს გამოხმაურებისკენ მოუწოდებს:

"არის ძუ, 3-4 წლის, უკეთია ყავისფერი საყელური. პატრონი დაგვიკავშირდეს ნომერზე —577 958 555".