ჭიდაობის ეროვნული ფედერაციის პრეზიდიუმის წევრი გურამ საღარაძე აცხადებს, რომ ჭიდაობის ფედერაციის პრეზიდენტის მიერ მოჭიდავის ცემის საკითხზე პრეზიდიუმმა სერიოზულად უნდა იმსჯელოს.

"ის უნდა იყოს მაგალითი ყველა ჩვენგანისთვის, დიდისთვის თუ პატარისთვის. ზრდილობის, სიკეთის, სიყვარულის, მეგობრობის და ერთ გუნდად შეკვრის და თანადგომის. ესეთი რამეები არ შეიძლება, ყოვლად მიუღებელია", — განაცხადა საღარაძემ რუსთავი 2-თან ინტერვიუში.

დაპირისპირება ჭიდაობის ფედერაციის პრეზიდენტსა და მოჭიდავეს შორის

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს დაპირისპირება მოხდა, რა დროსაც ევროპის ორგზის ჩემპიონი, მოჭიდავე ზურაბ დათუნაშვილი დაშავდა. თავდაპირველად გავრცელებული ინფორმაციით, დაპირისპირების მიზეზი მსაჯის დაწერილი ქულა გახდა, რამაც მოჭიდავის უკმაყოფილება და გულშემატკივრების დაპირისპირება გამოიწვია. თუმცა, დათუნაშვილმა განაცხადა, რომ დაპირისპირება ფედერაციის პრეზიდენტთან დაახლოებულმა პირებმა დაიწყეს, როცა მის ძმას, რომელიც იმ მომენტში მისი სეკუნდანტი იყო ფიზიკური შეურაცხყოფა მიაყენეს. მისივე თქმით, გულშემატკივარი გაშველებას ცდილობდა და არა ერთმანეთს უპირისპირდებოდა.

მოგვიანებით, რუსთვი 2-მა ვიდეომასალა გაასაჯაროვა, სადაც ჩანს, რომ ფედერაციის პრეზიდენტი გეგა გეგეშიძე დათუნაშვილს სახეში რკინის საგანს და მუშტს ურტყამს.

ფოტო: კადრები ვიდეოდან / რუსთავი 2

მოჭიდავე ამბობს, რომ ფედერაციის ხელმძღვანელობასთან უთანხმოება აქამდეც ჰქონდა სხვა საკითხზე არასამართლიანი გადაწყვეტილებების გამო. მისივე თქმით, ფედერაციას ჰყავს გარკვეული ჯგუფი, რომელიც მათთვის არასასურველ პირებს მსგავსი ძალადობრივი მეთოდებით უპირისპირდება.

მომხდარის შესაფასებლად On.ge დაუკავშირდა ჭიდაობის ეროვნული ნაკრების მთავარ მწვრთნელს, გიორგი იანტბელიძეს, რომელმაც განაცხადა, რომ ძალადობის ფაქტი არა ფედერაციის პრეზიდენტის, არამედ დათუნაშვილის და მისი მხარდამჭერების მხრიდან დაინახა.

"ძალადობის ფაქტი მე მეორე მხრიდან დავინახე. სხვა მე არ დამინახია არაფერი... სისხლი რომ მოსდიოდა [ზურაბ დათუნაშვილს], მაგან შეიძლება, შეხვედრაზე მოუწია, შეიძლება გულშემატკივრებთან მოუვიდა რაღაც", — აცხადებს იანტბელიძე.

შინაგან საქმეთა სამინისტროში On.ge-ს განუცხადეს, რომ საქმეზე გამოძიება სისხლის სამართლის კოდექსის 126-ე მუხლით დაიწყო. ამ მუხლით პირს სისხლისსამართლებრივი პასუხისმგებლობა ძალადობისთვის ეკისრება.

შსს-ში ამბობენ, რომ ის პირები, რომლებიც ინციდენტში მონაწილეობდნენ გამოკითხვაზე არ მივიდნენ. უწყებაში აცხადებენ, რომ გარემოებების გამოსავლენად ყველა კანონიერ ბერკეტს გამოიყენებენ და ისინი სასამართლო წესით დაიკითხებიან.