Facebook-მა რუსულ სახელისუფლებო მედია სპუტნიკთან კავშირში მყოფი 364 ყალბი ამბების გვერდი და ანგარიში გააუქმა. ეს გვერდები რუმინეთის, ლატვიის, ლიეტუვის, ესტონეთის, უკრაინისა და საქართველოს მოქალაქეებზე იყო გათვლილი. გადაწყვეყილების შესახებ დღეს, 17 იანვარს ცნობილი გახდა. ინფორმაციას ამის შესახებ CNN ავრცელებს.

Facebook-ის ცნობით, გვერდები ძირითადად ანტი-დასავლური, ანტი-ამერიკული და "ნატოს" საწინააღმდეგო დეზინფორმაციას ავრცელებდნენ. მთელი პერიოდის განმავლობაში ამ გვერდების ორგანიზებით 200 მეტი საპროტესტო ღონისძიება დაანონსდა.

სულ გათიშული გვერდებს 800 ათასი გამომწერი ჰყავდათ, მათ კონტენტის რეკლამირებაზე კი 2013 წლიდან დღემდე ჯამურად $135 ათასი დაიხარჯა. გაუქმებული გვერდების ნაწილი საინფორმაციო სააგენტოებს ეკუთვნოდა, სპუტნიკის თანამშრომლები კი მართავდნენ.

გარდა ამისა, დღესვე Facebok-მა დამატებით 107 გვერდი გააუქმა, რომელზეც არსებობდა ინფორმაცია, რომ უკრაინიდან იმართებოდა. გადამოწმების შედეგად დადგინდა, რომ, რეალურად, ფეისბუქგვერდებს რუსეთიდან მართავდნენ.

Facebook-ის ცნობით, აღნიშნული გვერდების იდენტიფიცირება, აშშ-ს უსაფრთხოების სამსახურების დახმარებით განხორციელდა.