ბათუმში ძლიერი ქარია. საგანგებო სიტუაციების სამსახურის ინფორმაციით, ამ ეტაპზე არავინ დაზარალებულა. მათი თქმით, ქარმა ერთ საცხოვრებელ სახლს სახურავი გადახადა და დააზიანა რამდენიმე შენობის ფანჯარა. მათივე თქმით, ქარის შედეგად მშენებარე კორპუსებიდან სამშენებლო მასალები ცვივა.

ბათუმელების ინფორმაციით, ქარის შედეგად სახურავიდან 2 ადამიანი გადმოვარდა. როგორც On.ge-ს სასწრაფო სამედიცინო დახმარების პრესსამსახურში განუცხადეს, მათ მიიღეს შეტყობინება გადმოვარდნილი 2 პირის შესახებ, თუმცა ვერ ადასტურებენ გადმოაგდო თუ არა ისინი ქარმა. მათი თქმით, ერთ-ერთ პირს მედიკოსების დახმარება არ დასჭირდა, მეორე კი მსუბუქი ჭრილობით ბათუმის რეფერალურ საავადმყოფოში გადაიყვანეს.

გარემოს დაცვის ეროვნული სააგენტოს ინფორმაციით, დღეს, 16 იანვარს დასავლეთ საქართველოს უმეტეს და აღმოსავლეთ საქართველოს ზოგიერთ რაიონში დროგამოშვებით მოსალოდნელია ძლიერი ქარი და წვიმა. მათივე თქმით, მთიან და მაღალმთიან ზონაში მოსალოდნელია ძლიერი ნისლი და ქარბუქი.