შინაგან საქმეთა სამინისტროს განცხადებით, დაკავებულია ერთი პირი, რომელსაც არასრულწლოვნების მიმართ ჩადენილი იძულებისა და პირადი ცხოვრების შესახებ ინფორმაციის ხელყოფა ედება ბრალად.

შსს-ს ცნობით, გამოძიება ერთ-ერთი არასრულწლოვნის მშობლის შეტყობინების საფუძველზე დაიწყო. გამოძიების ვერსიით, ბრალდებული, ზრდასრული კაცი, ფეისბუქის გამოყენებით სისტემატიურად აიძულებდა არასრულწლოვნებს მასთან ინტიმური ხასიათის მიმოწერა ჰქონოდათ. უწყების მტკიცებით, ამ გზით მოიპოვებდა და ხელყოფდა არასრულწლოვნების პირადი ცხოვრების ამსახველ ინფორმაციას, ასევე მათ პერსონალურ მონაცემებს.

გამოძიება სისხლის სამართლის კოდექსის 150-ე და 157-ე მუხლებით მიმდინარეობს, რაც იძულებასა და პირადი ცხოვრების ამსახველი ინფორმაციის ან პერსონალური მონაცემების ხელყოფას გულისხმობს.