დონალდ ტრამპის შეხვედრა დემოკრატ კონგრესმენებთან, ნენსი პელოსისა და ჩაკ შუმერთან წარუმატებლად დასრულდა და რესპუბლიკელმა პრეზიდენტმა აშშ-მექსიკის საზღვართან კედლის აშენების დაფინანსებაზე უარი მიიღო.

ტრამპმა ტვიტერის საკუთარ გვერდზე დაწერა, რომ მათთან შეხვედრა "დროის სრული კარგვა იყო".

ჟურნალისტებთან საუბრისას კონგრესმენმა შუმერმა თქვა, რომ პრეზიდენტმა მოულოდნელად დატოვა შეხვედრა მას შემდეგ, რაც პელოსისგან უარი მოისმინა კედლის მშენებლობის თანხმობაზე:

"მან ჰკითხა სპიკერს, ეთანხმებით ჩემს კედელს? ნენსიმ უპასუხა: არა, ამ დროს წამოდგა და თქვა, მაშინ სასაუბრო არაფერი გვაქვსო და გავიდა".

აშშ-ს პრეზიდენტმა თქვა, რომ ქვეყანაში საგანგებო მდგომარეობის შემოღება შეუძლია, იმისათვის, რომ კონგრესის გვერდის ავლით აშშ-მექსიკის საზღვარზე კედლის მშენებლობის დაფინანსება მიიღოს.

22 დეკემბრიდან აშშ-ში გრძელდება ე.წ. შათდაუნი, ანუ მდგომარეობა, როცა ბიუჯეტის საკითხზე კონგრესისა და პრეზიდენტის შეუთანხმებლობის გამო სახელმწიფო დაწესებულებები მუშაობას წყვეტენ. ამჯერად, უთანხმოება მექსიკასთან საზღვარზე კედლის მშენებლობას უკავშირდება, რომლისთვისაც დონალდ ტრამპი ითხოვს 5 მილიარდ დოლარს. დემოკრატები მშენებლობის დაფინანსებაზე უარს ამბობენ.