ანდრო ბარნოვმა გირჩთან თანამშრომლობა შეწყვიტა. ამის შესახებ მან ფეისბუკზე, თავის ოფიციალურ გვერდზე გამოაქვეყნა განცხადება:

"დიდხანს ვითრიე ფეხი, მიჭირდა ამ გადაწყვეტილების მიღება. ერთის მხრივ არის დიდი ხნით ადრე დაანონსებული გადაწყვეტილება, რომ გორში ვიყარო კენჭი, მეორეს მხრივ კი - ეს ბანი, რომელიც ვერაფრით წარმომიდგენია "ჩემს გუნდად".

ძალიან ვწუხვარ, მაგრამ ჩემი ადგილი ამ პოლიტიკურ გადანაწილებაში არ არის. უბრალოდ არ არსებობს ასეთი ადგილი. ძალიან ვწუხვარ, რომ თავიდანვე დამოუკიდებლად არ დავაყენე კანდიდატურა. ახლა უბრალოდ ყველა ვადა გასულია".

ანდრო ბარნოვის თქმით, სწორედ ამ მიზეზით, ის არჩევნებში არ მიიღებს მონაწილეობას, რის გამოც მხარდამჭერებს ბოდიშს უხდის. ის ასევე წუხს, რომ გირჩმა მისი მოლოდინები ვერ გაამართლა: "ახალ პოლიტიკურ ცენტრს განვიხილავდი პლატფორმად, აქ ვხედავდი თანამოაზრეებს, ვისთანაც საერთო ხედვები და პრინციპები მქონდა, ახლა კი ამ ახალ კოალიციაში ყველაფერი ერთმანეთში აითქვიფა. ეს აღარ არის ჩემი თანამოაზრეების გუნდი, ეს აღარ არის იდეებისთვის ბრძოლის პროცესი, პარლამენტის სკამის დაკავება კი პანაცეა არ არის".

ანდრო ბარნოვმა, რომელიც წლების წინ პრეზიდენტ სააკაშვილის ადმინისტრაციის უფროსი, ასევე, სააკაშვილის საპრეზიდენტო ბიბლიოთეკის ხელმძღვანელი იყო, 2014 წელს ნაციონალური მოძრაობა დატოვა. მაშინ მან განაცხადა, რომ "იმ პრობლემებთან ბრძოლა, რომლებიც პარტიაში არსებობს, პარტიის შიგნიდან შეუძლებელი იყო. იქ (ნაციონალურ მოძრაობაში) გამეფებულია კლანური პარტოკრატია, არ არსებობს გადაწყვეტილებების მიღების ეფექტიანი, სამართლიანი მექანიზმები, არგუმენტები არავის აინტერესებს.

ბარნოვი რამდენიმე თვის წინ ამბობდა, რომ სურდა, 8 ოქტომბრის არჩევნებზე გირჩის სახელით გორში მაჟორიტარი დეპუტატობის კანდიდატად ეყარა კენჭი.

შესწორება: სტატიის თავდაპირველ სათაურსა და ტექსტში ეწერა, რომ ანდრო ბარნოვმა გირჩი დატოვა. ახალი პოლიტიკური ცენტრის ინფორმაციით, ანდრო ბარნოვი პარტიის წევრი არ ყოფილა, შესაბამისად, ამგვარი ფორმულირება ზუსტი არ არის. გირჩსა და ბარნოვს შორის მიმდინარეობდა მოლაპარაკებები, რაც ითვალისწინებდა გორში ბარნოვის დამოუკიდებელ კანდიდატად კენჭისყრისას, პარტიის მიერ მის მხარდაჭერას.