საქართველოს მართლმადიდებელი ეკლესიის პატრიარქმა, ილია მეორემ საშობაო ეპისტოლეში განათლების სისტემაზე ისაუბრა. ილია მეორე ამბობს, რომ სახელმწიფომ და სკოლამ უნდა იტვირთოს, როგორც სწავლების, ისე აღზრდის ფუნქცია, რადგან "ლუკმა-პურისთვის გასულ მშობლებს" შვილებისთვის ცოტა დრო რჩებათ.

"სკოლაში საათები უნდა დაეთმოს პირად ჰიგიენას, ხელსაქმეს, სახელობო მიმართულებებს, ბუნებასთან ურთიერთობას, სოფლის მეურნეობის შესახებ ზოგადი წარმოდგენის შექმნას, უნდა ფუნქციონირებდეს მუსიკალური, სამხატვრო, ლიტერატურული წრეები... უმნიშვნელოვანესია სპორტული დარბაზებითა და მოედნებით სასწავლებლების უზრუნველყოფა და სპორტულ წრეებში ბავშვების გაერთიანება, რომ მათ ენერგია აქ დახარჯონ და ჯანმრთელ და ძლიერ პიროვნებებად ჩამოყალიბდნენ", — ნათქვამია ეპისტოლეში.

ილია მეორე აცხადებს, რომ სკოლამ მოსწავლეებს შრომის სიყვარული, პატიების, სიმართლის დაცვის, ერთგულების, თანადგომისა და სიკეთის კეთების უნარი უნდა ჩაუნერგოს.

"ამის განხორციელების შემთხვევაში შეგვეძლება ვთქვათ, რომ მოზარდებს მივეცით საშუალება ჯანსაღ თაობად აღზრდისა; შევთავაზეთ სიკეთე და სიცოცხლე, დანარჩენი კი მათ გადაწყვეტილებაზე იქნება დამოკიდებული".

ამავე ეპისტოლეში საუბარია მშობლების მონაწილეობაზე სასკოლო ცხოვრებაში. პატრიარქი ამბობს, რომ პედაგოგებთან ხშირი შეხვედრა სავალდებულო უნდა გახდეს.

ამავე თემაზე: