საქართველოს პატრიარქი ილია მეორე საშობაო ეპისტოლეში ამბობს, რომ ყველა ეპოქას თავისი ჰეროდე ჰყავს, რომლის "ბოროტი საქმეებიც" თანამედროვე დროში სხვადასხვა სახით ვლინდება.

ჰეროდეს "ბოროტ და ბილწ საქმეებს" შორის პატრიარქი ასახელებს აბორტების თემას, ნარკომანიას, აზარტულ თამაშებსა და "უზნეო ცხოვრების წესს".

"აბორტით მოწყვეტილ ჩვილთა სისხლი ცას შეჰღაღადებს, ნარკომანია, აზარტული თამაშები თუ უზნეო ცხოვრების წესი ათასობით ახალგაზრდას იწირავს და ეს დანაშაულებანი ჩვენგან პასუხს ითხოვს. ჰეროდესეული სული იმასაც ცდილობს, ისეთი გარემო დაამკვიდროს, სადაც მისაბაძი აღარ იქნება სხვისთვის არა თუ თავის გაწირვა, ნაცვალგების გარეშე სიკეთის ქმნაც კი; მისაბაძი აღარ იქნება ზნეობრიობა და სიწმინდე და ადამიანებს დახშული ექნებათ სინდისის ხმა", — ნათქვამია ეპისტოლეში.

პატრიარქი რამდენიმე კითხვას სვამს:

  • თუ სიმართლე და სიკეთე განქარდება, ურთიერთპატივისცემა და პატიოსნება დაიკარგება, რაღა იქნება ჩვენი ყოფა?!
  • თუ მეგობრობა, სიყვარული და თანადგომა ადამიანთა ბუნებიდან წარიხოცება, ვინ შეძლებს ამგვარ სივრცეში ცხოვრებას?!
  • ასეთი საზოგადოება ხომ თავისთავად გახდება სიცოცხლის უუნარო და გადაგვარებისათვის განწირული, რადგან მას აღარ ექნება ძალა ბოროტების შეჩერებისა და ცოდვისთვის წინააღმდეგობის გაწევისა?

ამავე ეპისტოლეში პატრიარქი წერს, რომ თუ ყველაფერი ისე წარიმართება, რაზეც კითხვას სვამს, მაშინ სიკეთესა და ბოროტებას შორის ზღვარი გაქრება.

"სამწუხაროდ, ეს მდგომარეობა თანდათან ჩვენთანაც ფეხს იკიდებს და ხალხს შიში და უიმედობა იპყრობს, მაგრამ არ უნდა გავტყდეთ, არ უნდა დაგვაბრკოლოს არც გამრავლებულმა ღალატმა და გაუტანლობამ, არც შურმა და მზაკვრობამ. დროა ასეთი! არსებული რეალობა უნდა მივიღოთ, როგორც ჩვენი რწმენის დიდი გამოცდა და შევძლოთ, განვეშოროთ ბოროტებას, ჩვენდამი ჩადენილ ავ საქმეთა გამო, - სამაგიეროს გადახდას", — ამბობს პატრიარქი.

ის მოუწოდებს მართმადიდებელ საზოგადოებას არ დაკარგონ მომავლის იმედი , მოყვასის სიყვარული და მისდამი თანადგომის სურვილი.

"არ დავკარგოთ ღირსება და ძალისამებრ ჩვენისა, სიკეთით ვუპასუხოთ გამოწვევებს", — ნათქვამია პატრიარქის საშობაო ეპისტოლეში.

ამავე თემაზე: