მარჯვენასაჭიანი ჰიბრიდული ავტომანქანების იმპორტისას აქციზის გადასახადზე შეღავათი 60 პროცენტის ნაცვლად 20 პროცენტი იქნება. შესაბამისი კანონპროექტი საქართველოს პარლამენტში უკვე დარეგისტრირდა. მისი ავტორები ქართული ოცნების დეპუტატები არიან.

ამავე კანონპროექტის მიხედვით, მარჯვენასაჭიანი ელექტრომანქანების აქციზის განაკვეთი ასაკის მიხედვით მსუბუქი ავტომობილების აქციზის განაკვეთის 1000-ზე გამრავლებით განისაზღვრება. ცვლილება საგადასახადო კოდექსში შევა. კანონპროექტის მიზანი მარჯვენასაჭიანი ავტომობილების იმპორტის შემცირებაა.

კანონპროექტის განმარტებით ბარათში ნათქვამია, რომ საქართველოში ელექტრომობილების ბაზარი მზარდია, ისევე როგორც მსოფლიოში. საქართველო კი საქართველო დაგეგმილია მთლიანად მარცხენასაჭიან მანქანებზე მოძრაობისთვის. შემოსავლების სამსახურის სტატისტიკით, მხოლოდ 2017 წელსა და 2018 წლის 7 თვის მონაცემებით, საქართველოში იმპორტირებულია:

  • მარცხენასაჭიანი ჰიბრიდული ავტომობილი - 26,463;
  • მარჯვენასაჭიანი ჰიბრიდული ავტომობილი - 4,277;
  • მარცხენასაჭიანი ელექტრომობილი - 386;
  • მარჯვენასაჭიანი ელექტრომობილი - 799.

საქართველოს საგადასახადო კოდექსში 2016 წლის 16 დეკემბერს განხორციელდა ცვლილება, რომელიც 2017 წლის 2 იანვარს ამოქმედდა. ამ ცვლილებით, მარჯვენასაჭიანი ავტომობილები შესაბამისი კატეგორიის მსუბუქი ავტომობილისთვის განსაზღვრული აქციზის განაკვეთის სამმაგი ოდენობით იბეგრებიან. ამავე ცვლილებების თანახმად, როგორც მარჯვენასაჭიანი, ისე მარცხენასაჭიანი ჰიბრიდული ავტომანქანების იმპორტისას დაწესდა 60 პროცენტიანი შეღავათი აქციზური გადასახადის გადახდისას.