ამერიკის შეერთებული შტატების წარმომადგენელთა პალატამ, რომელსაც 3 იანვრიდან დემოკრატები აკონტროლებენ, მთავრობის მუშაობის განახლებასა და შიდა უსაფრთხოების სამინისტროს დაფინანსებას მხარი დაუჭირა. ამის მიუხედავად, სავარაუდოა, რომ აშშ-ს პრეზიდენტი დონალდ ტრამპი საკანონმდებლო წინადადებას ვეტოს დაადებს.

ასევე სავარაუდოა, რომ კანონპროექტს მხარს არც სენატი დაუჭერს. სენატში უმრავლესობა რესპუბლიკელებს აქვთ. სენატში რესპუბლიკელთა ლიდერმა მიჩ მაკკონელმა დემოკრატების მიერ კანონპროექტების მიღებას პოლიტიკური თეატრი უწოდა.

წარმომადგენლობითმა პალატამ ასევე მხარი დაუჭირა კანონპროექტს, რომელშიც მექსიკის საზღვარზე ახალი კედლის ასაშენებელი თანხა არ იყო გათვალისწინებული.

აშშ-ში უკვე მეორე კვირაა გრძელდება ე.წ. შათდაუნი, ანუ მდგომარეობა, როცა ბიუჯეტის საკითხზე კონგრესისა და პრეზიდენტის შეუთანხმებლობის გამო სახელმწიფო დაწესებულებები მუშაობას წყვეტენ. ამჯერად, უთანხმოება მექსიკასთან საზღვარზე კედლის მშენებლობას უკავშირდება, რომლისთვისაც დონალდ ტრამპი ითხოვს 5 მილიარდ დოლარს. დემოკრატები მშენებლობის დაფინანსებაზე უარს ამბობენ.