ენერგეტიკის მინისტრი კახი კალაძე გადაცემა P.S-ში საკონსტიტუციო სასამართლოს მოსამართლე ლალი ფაფიაშვილის დედასთან დაკავშირებულ სიუჟეტს გამოეხმაურა და აცხადებს, რომ ეს პროცესები აშკარა პოლიტიკური სპეკულაციებია.

გადაცემაში აქცენტი მოსამართლე ლალი ფაფიაშვილის დედა, ტატიანა ახვლედიანის სამართალდარღვევასთან შესაძლო კავშირზე გაკეთდა. საქმე ეხება დოკუმენტების გაყალბებას სანოტარო ბიუროში, რომელშიც ტატიანა ახვლედიანი მუშაობს. რუსთავი 2-ის პოზიციის მიხედვით, ხელისუფლება სწორედ ამ საქმეს იყენებს, რათა ზემოქმედება მოახდინოს მოსამართლე ლალი ფაფიაშვილზე, რომელმაც სასამართლოში უნდა განიხილოს ტელეკომპანიის საქმე.

კალაძე აცხადებს, რომ მოსამართლეებზე ზეწოლასთან დაკავშირებით ადრეც აქვს კომენტარი გაკეთებული და ამის შესახებ საფუძვლიანი ეჭვიც არსებობდა, თუმცა საქმე კონკრეტულ მოსამართლეებს ეხებოდა:

"დაწყებულია გამოძიება, თუმცა პარალელურად, ჩვენ ვისმენდით განცხადებებს მოსამართლეების მხრიდან, რომ არანაირი ზეწოლა, თვალთვალი მათზე არ მიმდინარეობდა და აშკარად იკვეთებოდა, რომ ეს იყო პოლიტიკური სპეკულაციები".

თავად ლალი ფაფიაშვილი დედამისის ბრალეულობას გამორიცხავს და აცხადებს, რომ დანაშაული ჩადენის შემთხვევაში ის პასუხისგებაში აუცილებლად მიეცემოდა.