პარტია ნაციონალური მოძრაობის დეპუტატმა, სალომე სამადაშვილმა ეკა ბესელიასთან დაპირისპირების შემდეგ იურიდიულ საკითხთა კომიტეტი დატოვა. მისი თქმით, იურიდიულ საკითხთა კომიტეტში არ ეძლევა საშუალება გამოთქვას საკუთარი აზრი, ამიტომ ადამიანის უფლებათა კომიტეტში გაწევრიანებას მოითხოვს.

"მივიღე გადაწყვეტილება, რომ იურიდიული კომიტეტი დავტოვო, მოითხოვო ადამიანის უფლებების კომიტეტში გაწევრიანება, იმიტომ რომ იქ, იმედი მაქვს, ვერ დაბლოკავენ ჩემს საპარლამენტო საქმიანობას, იმ მიზეზით, რომ ესა თუ ის საკითხი არ შედის კომიტეტის დღის წესრიგში ან კომიტეტის მანდატში. ეს გადაწყვეტილება მივიღე დღეს და მივმართავ დღესვე შესაბამისი თხოვნით პარლამენტის ბიუროს", — განაცხადა სალომე სამადაშვილმა.

იურიდიულ საკითხთა კომიტეტის სხდომა ხმაურისა და დაპირისპირების ფონზე წარიმართა. ერთმანეთს მმართველი გუნდის და ოპოზიციის წევრები დაუპირისპირდნენ. ხმაური კახეთში ველისციხესთან შინაგან საქმეთა სამინისტროსა და სამართალდამცველების ქმედებების განხილვას მოჰყვა.

ოპოზიციამ მოითხოვა შინაგან საქმეთა მინისტრმა პასუხი გასცეს კითხვებს, რომელიც კახეთში განვითარებულ მოვლენებს ეხება, თუ რატომ არ შეუშვეს გაერთიანებული ოპოზიციის წევრები და მხარდამჭერები თელავში და რატომ დააკავეს ოპოზიციის ლიდერი დავით კირკიტაძე.

ეკა ბესელიამ სალომე სამადაშვილსა ოთარ კახიძეს დარბაზის დატოვება სთხოვა, წინააღმდეგ შემთხვევაში კი სიმშვიდისკენ მოუწოდა. სალომე სამადაშვილმა სხდომა პროტესტის ნიშნად დატოვა და ჟურნალისტებთან განაცხადა, რომ იურიდიულ საკითხთა კომიტეტს ტოვებს