იურიდიულ საკითხთა კომიტეტის სხდომა ხმაურისა და დაპირისპირების ფონზე წარიმართა. ერთმანეთს მმართველი გუნდის და ოპოზიციის წევრები დაუპირისპირდნენ. ხმაური კახეთში ველისციხესთან შინაგან საქმეთა სამინისტროსა და სამართალდამცველების ქმედებების განხილვას მოჰყვა.

ოპოზიციამ მოითხოვა შინაგან საქმეთა მინისტრმა პასუხი გასცეს კითხვებს, რომელიც კახეთში განვითარებულ მოვლენებს ეხება, თუ რატომ არ შეუშვეს გაერთიანებული ოპოზიციის წევრები და მხარდამჭერები თელავში და რატომ დააკავეს ოპოზიციის ლიდერი დავით კირკიტაძე.

ევროპული საქართველოს დეპუტატის, ოთარ კახიძის განცხადებით, იურიდიულ საკითხთა კომიტეტმა ბოლო დროს განვითარებულ მოვლენებს სამართლებრივი შეფასება უნდა მისცეს და ამ საკითხების დღის წესრიგში დამატების საკითხი განიხილა.

ეკა ბესელიას თქმით, ოთარ კახიძის შეთავაზება მისაღებია და კომიტეტი განიხილავს ამ საკითხის დღის წესრიგში დამატებას. მან მიუთითა ოპოზიციას რეგლამენტისა და პროცედურების დაცვისკენ.

კახიძის თქმით, როდესაც დეპუტატს აზრის გამოთქმა სურს, მას უნდა მოუსმინონ. ბესელიამ კი კახიძეს ახალი რეგლამენტი შეახსენა და უთხრა, რომ ახალი რეგლამენტის დაყენება, წერილობით ხდება წინ დღეს.

ბესელიას თქმით, ოპოზიცია პარლამენტში დებოშის მოსაწყობად და სხდომის ჩაშაშლელად მივიდა.

ეკა ბესელიამ სალომე სამადაშვილსა ოთარ კახიძეს დარბაზის დატოვება სთხოვა, წინააღმდეგ შემთხვევაში კი სიმშვიდისკენ მოუწოდა. სალომე სამადაშვილმა სხდომა პროტესტის ნიშნად დატოვა და ჟურნალისტებთან განაცხადა, რომ იურიდიულ საკითხთა კომიტეტს ტოვებს.