საქართველოს სახალხო დამცველი, ნინო ლომჯარია შინაგან საქმეთა სამინისტროს მიმართავს და შეახსენებს, რომ თელავის მიმართულებით აქციის მონაწილეთა გადაადგილება კონსტიტუციური უფლებაა. ასე გამოეხმაურა ომბუდსმენი გაერთიანებული ოპოზიციის აქციის მონაწილეთათვის თელავისკენ მიმავალი გზის გადაკეტვას.

"საქართველოს სახალხო დამცველი მოუწოდებს საქართველოს შინაგან საქმეთა სამინისტროს უზრუნველყოს მომიტინგეთა შესაძლებლობა, გადაადგილდნენ თავისუფლად თელავის მიმართულებით, მანიფესტაციის გამართვის მიზნით", — აღნიშნულია სახალხო დამცველის აპარატის მიერ გავრცელებულ განცხადებაში.

უწყების ინფორმაციით, ისინი აკვირდებიან მიმდინარე მოვლენებს და საკითხს შეისწავლიან.

გაერთიანებული ოპოზიციის წარმომადგენლები სალომე ზურაბიშვილის პრეზიდენტად ინაუგურაციის პარალელურად თელავში აქციას გეგმავდნენ. იმის გამო, რომ მათ გზა რამდენჯერმე გადაუკეტეს, უცნობია გაიმართება, თუ არა აქცია კვლავ.