TI-ის ინფორმაციით, შეკითხვაზე, უნდა სარგებლობდეს თუ არა საქართველოს მართლმადიდებლური ეკლესია კონსტიტუციური შეთანხმებით მინიჭებული განსაკუთრებული სტატუსითა და შეღავათებით, პოლიტიკურ პარტიათა უმრავლესობა დადებითად პასუხობს. ინფორმაცია ამის შესახებ TI-ის ახალი ვებსაიტის მეშვეობით გახდა ცნობილი.

ამ პარტიებს შორისაა:

  • ენმ,
  • თავისუფალი დემოკრატები,
  • ეროვნული ფორუმი,
  • დემოკრატიული მოძრაობა - ერთიანი საქართველო,
  • თავისუფალი დემოკრატები,
  • მრეწველები.

რაც შეეხება პარტიებს, რომლებმაც ზემოაღნიშნულ შეკითხვას უარყოფითად უპასუხეს, ესენია: ახალი პოლიტიკური ცენტრი - გირჩი და რესპუბლიკური პარტია.

საერთაშორისო გამჭვირვალობა - საქართველომ ახალი ვებსაიტის, Chemikhma.ge-ს პრეზენტაცია დღეს გამართა. საიტზე შესული მომხმარებელი კითხვარს ავსებს, შემდეგ კი თავის პასუხებს სხვადასხვა პოლიტიკური პარტიის მიერ გაცემულ შესაბამის პასუხებს ადარებს, რომლებიც, თავის მხრივ, მათი საარჩევნო პროგრამების მიხედვითაა შევსებული.

კითხვები კატეგორიებად არის დაყოფილი, რომელშიც შედის სოციალურ-ეკონომიკური, გარემოსდაცვითი, საშინაო, ჯანდაცვის, საგარეო პოლიტიკისა და განათლების საკითხები. როდესაც მომხმარებელი კითხვარის შევსებას ასრულებს, მისთვის ნათელი ხდება, თუ რომელი პოლიტიკური პარტიის საარჩევნო პროგრამასთან აქვს თანმხვედრი შეხედულებები.

აღსანიშნავია, რომ TI-ის თხოვნის შესაბამისად, კითხვარი მხოლოდ 7-მა პარტიამ შეავსო. რაც შეეხება მოძრაობას პაატა ბურჭულაძე - სახელმწიფო ხალხისთვის, საქარველოს კონსერვატიული პარტიას, ლეიბორისტულ პარტიასა და პატრიოტთა ალიანსს, მათ კითხვარის შევსებისგან, სხვადასხვა მიზეზის გამო, თავი შეიკავეს.

კითხვარის შევსებაზე უარი ქართულმა ოცნებამაც თქვა.