პრემიერ-მინისტრი მამუკა ბახტაძე აჭარის მთავრობის თავმჯდომარის თორნიკე რიჟვაძის განცხადებას გამოეხმაურა და აღნიშნა, რომ რიჟვაძე "მსგავს შინაარსობრივ განცხადებას არასდროს გააკეთებდა". აჭარის მთავრობის თავმჯდომარის განცხადებით, ის პირადად იძიებს შურს ყველა იმ ადამიანზე, რომელიც "გაბედავს აჭარელი ხალხის ღირსების შეურაცხყოფას".

"მე ეს კონტექსტი არ ვიცი, რაზეც თქვენ საუბრობთ, მაგრამ მე დარწმუნებული ვარ, რომ თორნიკე რიჟვაძე მსგავს შინაარსობრივ განცხადებას არასდროს გააკეთებდა. ის არის ძალიან პასუხისმგებლიანი პოლიტიკოსი. ის 24 საათი მუშაობს თავისი კაცისთვის. მიუხედავად იმისა, რომ სულ რამდენიმე თვეა თავის თანამდებობაზეა, მან ძალიან მნიშვნელოვანი შედეგები მოუტანა აჭარას. რაც შეეხება ამ კონტექსტს, ეს არასწორი ინტერპრეტაციის შედეგი და თქვენგან გავიგე პირველად", — აღნიშნა ბახტაძემ.

თორნიკე რიჟვაძემ თავისი განცხადებით ლეიბორისტული პარტიის წევრს, ჯელალ ქიქავას უპასუხა. თავმჯდომარე საუბრობდა, რომ "ყველა ეს ადამიანი ველიდან გაიწმინდება".

"ჩვენ მათ საკონტროლო დარტყმა გავუკეთეთ და პირობას ვდებ, რომ ამ პროცესს მივიყვანთ ბოლომდე. ყველა ეს ადამიანი ამ ველისგან გაიწმინდება. არავისთან არ ვაპირებ არც პოლიტიკურ, არც მერკანტილურ ვაჭრობას. ბატონი პრემიერის ხელმძღვანელობით ჩვენი გუნდი დაიცავს თითოეული ადამიანის უფლებას და თავისუფლებას. უნდა მიეჩვიონ, რომ ჩვენთან ვაჭრობა ვერ გაგრძელდება ვერც მერკანტილური, ვერც პოლიტიკური", — თქვა რიჟვაძემ.

ტელეკომპანია პირველის ეთერში 7 დეკემბერს ქიქავამ განაცხადა, რომ იმან, რაც არჩევნებზე მოხდა, მოსახლეობაში რევოლუციური ტალღა წარმოშვა.

"სახელმწიფოში რევოლუციის სუნი ტრიალებს და ეს სუნი შემოიტანა სალომე ზურაბიშვილმა… ბათუმში რა მოხდა? ჩვენ ბათუმში ვნახეთ გაჭირვებული ხალხის ბუმი, კინაღამ ქალაქი გადაწვეს. იმას [მარტის მოვლენებს] არ ჰყავდა ხელმძღვანელი, იმას რომ ხელმძღვანელი ჰყოლოდა, ისინი მთელ ქალაქს გადაწვავდნენ... მაშინაც ვთქვი, რომ 300 წელი ყივჩაღები აუპატიურებდნენ აჭარლებს, ცოლებს, შვილებს იპარავდნენ, მუსლიმანობას აღებიებდნენ და აჭარლები გარეთ არ გამოსულან. ამათ 6 თვეში იმდენი გააკეთეს, რომ აჭარლები გამოიყვანეს გარეთ და კინაღამ თავისი ქალაქი გადააწვევინენ..." — ამბობდა ჯელალ ქიქავა.