აჭარის მთავრობის თავმჯდომარის, თორნიკე რიჟვაძის განცხადებით, ის პირადად იძიებს შურს ყველა იმ ადამიანზე, რომელიც "გაბედავს აჭარელი ხალხის ღირსების შეურაცხყოფას". ასე უპასუხა რიჟვაძემ ლეიბორისტული პარტიის წევრის, ჯელალ ქიქავას განცხადებას.

თავის განცხადებაში, რომელიც რიჟვაძემ ფეისბუქით გაავრცელა, თავმჯდომარე საუბრობს, რომ "ყველა ეს ადამიანი ველიდან გაიწმინდება".

"ჩვენ მათ საკონტროლო დარტყმა გავუკეთეთ და პირობას ვდებ, რომ ამ პროცესს მივიყვანთ ბოლომდე. ყველა ეს ადამიანი ამ ველისგან გაიწმინდება. არავისთან არ ვაპირებ არც პოლიტიკურ, არც მერკანტილურ ვაჭრობას. ბატონი პრემიერის ხელმძღვანელობით ჩვენი გუნდი დაიცავს თითოეული ადამიანის უფლებას და თავისუფლებას. უნდა მიეჩვიონ, რომ ჩვენთან ვაჭრობა ვერ გაგრძელდება ვერც მერკანტილური, ვერც პოლიტიკური", — თქვა რიჟვაძემ.

თავისი განცხადებით რიჟვაძე გამოეხმაურა ლეიბორისტული პარტიის წევრისა და ბათუმის მერობის ყოფილი კანდიდატის, ჯელალ ქიქავას განცხადებას. ტელეკომპანია პირველის ეთერში 7 დეკემბერს ქიქავამ განაცხადა, რომ იმან, რაც არჩევნებზე მოხდა, მოსახლეობაში რევოლუციური ტალღა წარმოშვა.

"სახელმწიფოში რევოლუციის სუნი ტრიალებს და ეს სუნი შემოიტანა სალომე ზურაბიშვილმა… ბათუმში რა მოხდა? ჩვენ ბათუმში ვნახეთ გაჭირვებული ხალხის ბუმი, კინაღამ ქალაქი გადაწვეს. იმას [მარტის მოვლენებს] არ ჰყავდა ხელმძღვანელი, იმას რომ ხელმძღვანელი ჰყოლოდა, ისინი მთელ ქალაქს გადაწვავდნენ... მაშინაც ვთქვი, რომ 300 წელი ყივჩაღები აუპატიურებდნენ აჭარლებს, ცოლებს, შვილებს იპარავდნენ, მუსლიმანობას აღებიებდნენ და აჭარლები გარეთ არ გამოსულან. ამათ 6 თვეში იმდენი გააკეთეს, რომ აჭარლები გამოიყვანეს გარეთ და კინაღამ თავისი ქალაქი გადააწვევინენ..." — ამბობდა ჯელალ ქიქავა.