მათ, ვინც სამეფო კარის თამაშების ახალ სეზონს ელით, უნდა იცოდეთ, რომ საკულტო სერიალის დასასრულის დასაწყისი ახლოვდება. HBO-მ უკანასკნელი სეზონის პირველი ტიზერი გამოაქვეყნა.

39-წამიან ვიდეოს ტვიტერზე უკვე მილიონობით ნახვა აქვს.

ტიზერში ვხედავთ, რომ ვესტეროსში ზამთარი უკვე მოვიდა და კონტინენტს ნელ-ნელა ყინვა იპყრობს, რაც თეთრ მოხეტიალეებს გამოხატავს. ვინაიდან ღამის მეფემ უკვე გადალახა კედელი მისი პირველი მსხვერპლი ვინტერფელია. ტიზერში ვხედავთ, როგორ იპყრობს ყინული სტარკების სამეფოს, რის შემდეგაც ტარგარიანთა სამყოფელი დრაკონის ქვაც გაიყინება.

ამავდროულად, სამხრეთიდან ცეცხლი მოეშურება და გზად ყველაფერს შთანთქავს. ვხედავთ ლანისტერის სახლს და საბოლოოდ ჯორჯ მარტინის მიერ შექმნილი ცეცხლისა და ყინულის შერკინებას, რომელიც აშკარაა, რომ უბრალოდ ეპიკური იქნება.

შოუს 6-ეპიზოდიანი სეზონი იქედან გაგრძელდება, სადაც მეშვიდე სეზონი დასრულდა.

"ბოლო სეზონის მესამე ნაწილში ბრძოლა გველის, რომელიც შოუს შემქმნელთა გათვლებით, ტელევიზიის ისტორიაში უდიდესი იქნება. ის თითქმის მთელი ეპიზოდის განმავლობაში, ერთ საათს გაგრძელდება", - ამბობს ღამის მეფის როლის შემსრულებელი ვლადიმირ ფურდიკი.

მეშვიდე სეზონის ფინალიდან მაყურებელმა შეიტყო, რომ ჯონ სნოუ ნედ სტარკის დის, ლიანა სტარკის შვილია, რომელიც საიდუმლოდ იყო დაქორწინებული დაენერის ტარგარიანის ძმაზე, რეიგარ ტარგარიანზე. ასე რომ, დაენერისი სნოუს მამიდა გამოდის, თუმცა ეს მათ სასიყვარულო ურთიერთობას არ აბრკოლებს.

სამეფო კარის თამაშების შემაძრწუნებელი ბოლო სეზონის პრემიერა 2019 წლის აპრილში გაიმართება. მაყურებლისთვის შოუს გამოსვლის ოფიციალური რიცხვი ჯერ ისევ უცნობია.