ერთიანი ნაციონალური მოძრაობის პარტიულ სიაში ცვლილებაა. ამის შესახებ დღეს გამართულ ბრიფინგზე პარტიის ერთ-ერთმა ლიდერმა დავით ბაქრაძემ განაცხადა. მისი თქმით, ყოფილი პირველი ლედი ზუგდიდის მაჟორიტარობის კანდიდატობასთან ერთად პარტიული სიის მეორე ნომერი იქნება.

"რამდენიმე დღის წინ ჩვენმა პარტიამ განაცხადა სანდრა რულოვსის გადაწყვეტილების შესახებ, შემოსულიყო ჩვენს პოლიტიკურ გუნდში. მინდა გაცნობოთ კიდევ ერთი გადაწყვეტილება, რომელიც უკავშირდება ნაციონალური მოძრაობის საარჩევნო სიას, კერძოდ მის პირველ ათეულს. ვინაიდან ქალბატონმა სანდრამ გადაწყვიტა და მონაწილეობას იღებს პოლიტიკურ ბრძოლაში როგორც ჩვენი გუნდის წევრი, ამიტომ ბუნებრივია ზუგდიდის მაჟორიტარობის გარდა ის ასევე იქნება ნაციონალური მოძრაობის საარჩევნო სიაში და ზუგდიდის მაჟორიტარობასთან ერთად ქალბატონი სანდრა რულოვსი იქნება ჩვენი პარტიული სიის მეორე ნომერი."

ენმ-ის პირველი ათეული ჯერ კიდევ 15 მაისს გახდა ცნობილი და ის ასე გამოიყურებოდა:

  1. დავით ბაქრაძე
  2. ელენე ხოშტარია
  3. რომან გოცირიძე
  4. ნიკა მელია
  5. გიორგი ტუღუში
  6. ოთო კახიძე
  7. სალომე სამადაშვილი
  8. ირაკლი აბესაძე
  9. სერგი კაპანაძე
  10. სერგო რატიანი.

სანდრა რულოვსი ზუგდიდში ნაციონალური მოძრაობის მაჟორიტარობის კანდიდატად 19 აგვისტოს წარადგინეს.