საპრეზიდენტო არჩევნებში გამარჯვებული კანდიდატი სალომე ზურაბიშვილი აცხადებს, რომ თუ საქართველოს მოსახლეობა ქვეყნის შიგნით არ გაერთიანდა ოკუპირებულ ტერიტორიების დაბრუნებას ვერ შეძლებენ.

რუსულ BBC-სთან ინტერვიუში კანდიდატმა საზოგადოებაში არსებულ დაპირისპირებაზე და საპრეზიდენტო კამპანიაზე ისაუბრა. ზურაბიშვილი აღნიშნავდა, რომ ის პირადი სიტყვიერი თავდასხმის ობიექტი ხდებოდა და საზოგადოება არჩევნებმა ორად გაყო.

ზურაბიშვილმა ასევე განაცხადა, რომ მისთვის უფრო მარტივი იყო ფრანგი დიპლომატობა, ვიდრე ქართველი პოლიტიკოსობა. მისი თქმით, ბევრი რამ რაც საფრანგეთში ნორმად ითვლება საქართველოში ჯერ კიდევ არ არის დამკვიდრებული. კანდიდატი თვლის, რომ მიუხედავად 25-წლიანი დამოუკიდებლობისა საქართველოს მოსახლეობაში პოსტსაბჭოთა მენტალიტეტი შემორჩა, ამიტომ საჭიროა ევროპული ღირებულებების დამკვიდრება.

ამავე ინტერვიუში სალომე ზურაბიშვილმა აღნიშნა ისიც, რომ ოკუპაციის პირობებში რუსეთთან თანამშრომლობა შეუძლებელია. მისივე თქმით, თუკი დასავლელი, ევროპელი ან ამერიკელი პარტნიორები დიალოგს დაიწყებენ რუსეთთან, რაიმე ფორმით, "საქართველოც მათ გვერდით იქნება".

საპრეზიდენტო არჩევნების მეორე ტურზე მთავრობის მხარდაჭერილმა სალომე ზურაბიშვილმა გაერთიანებული ოპოზიციის კანდიდატს თითქმის 400 000 ხმით მოუგო.