შინაგან საქმეთა სამინისტრო On.ge-ს ჟურნალისტისთვის, სალომე ჩადუნელისთვის მუშაობაში ხელის შეშლის საქმეს ძალადობის მუხლით იძიებს. ამის შესახებ დაზარალებულს შსს-ში განუცხადეს.

ინციდენტი გუშინ, 28 ნოემბერს, არჩევნების გაშუქების დროს მოხდა. თბილისში, ლუბლიანას ქუჩაზე, 54-ე საარჩევნო უბანზე, როცა ის ჟურნალისტურ საქმიანობას ასრულებდა ფიზიკური და სიტყვიერი შეურაცხყოფა მიაყენეს. ფიზიკური შეურაცხყოფის დროს ხელიდან გააგდებინეს მობილური ტელეფონი, რომლითაც ვიდეოს იღებდა.

მართალია, შსს საქმეს ძალადობის (126) მუხლით იძიებს, თუმცა სისხლის სამართლის კოდექსით ჟურნალისტის საქმიანობაში ხელის შეშლისთვის პასუხისმგებლობა სხვა (154) მუხლით დგება.

ძალადობისთვის მაქსიმალური სასჯელი ერთწლიანი პატიმრობა და რიგი უფლებების შეზღუდვაა, ჟურნალისტის საქმიანობის ხელის შეშლისთვის კი მაქსიმალური სასჯელი ორწლიანი პატიმრობა და შინაპატიმრობა.

არჩევნების დღეს შეურაცხყოფა მიაყენეს TV პირველის ჟურნალისტსაც.