მოსამართლე გიორგი გელაშვილს განაჩენის გამოცხადებისას სასჯელის ზომა შეეშალა — ია დარახველიძეს 3 წლის ნაცვლად 5 წლით პატიმრობა აქვს მისჯილი.

ია დარახველიძეს 4 ოქტომბრის საქმეზე ორგანიზებულ ჯგუფურ ძალადობაში მონაწილეობა ედებოდა ბრალად, რაც 4-დან 6-წლამდე თავისუფლების აღკვეთას ითვალისწინებს. "პუბლიკას" ინფორმაციით, მოსამართლე გიორგი გელაშვილმა დარახველიძეს არც ბრალი გადაუკვალიფიცირა და აღნიშნულ მუხლზე 3 წლის განაჩენი არ განმარტა.

მოგვიანებით სასამართლო დარახველიძის ადვოკატს, რევაზ აჭარაძეს დაუკავშირდა და განუმარტეს, რომ "ტექნიკური შეცდომა იყო" და მის დაცვის ქვეშ მყოფს 5 წლით თავისუფლების აღკვეთა აქვს მისჯილი.

ია დარახველიძე სასამართლო პროცესზე არ იმყოფებოდა. პროცესის შემდეგ ცნობილი გახდა, რომ მასზე ქვეყნის მასშტაბით ძებნა გამოცხადდა. ადვოკატის განცხადებით, მისი ადგილმდებარეობის შესახებ ინფორმაცია არ აქვთ.