ვიეტნამის პოლიციამ ქალაქ ხოშიმინში კატის ხორცით უკანონო ვაჭრობის ფართომასშტაბიანი სქემა გამოავლინა და 500-ზე მეტი ცხოველი გადაარჩინა. სამართალდამცავების მიერ ჩატარებული სპეცოპერაციის შემდეგ, ათობით კატა უკვე დაუბრუნდა თავის პატრონს.

სამართალდამცავებმა გამოძიება შინაური ცხოველების მასობრივი ქურდობის ფაქტებზე დაიწყეს, რამაც ისინი იმ ადგილებამდე მიიყვანა, სადაც კატები გალიებში ჰყავდათ გამომწყვდეული.

რეიდის დროს, ერთ-ერთ ობიექტზე ხელისუფლებამ დაახლოებით 400 ცოცხალი კატა იპოვა, მოგვიანებით კი, სხვა ლოკაციებზე — რამდენიმე ცხოველი და ათობით მკვდარი კატა. სულ კი პოლიციამ 500-ზე მეტი კატის გადარჩენა შეძლო.

სპეცოპერაციის ფარგლებში სამართალდამცავებმა 9 პირი დააკავეს.

ცხოველთა დაცვის ორგანიზაციის, Humane World for Animals-ის განცხადებით, 40-ზე მეტი კატა უკვე დაბრუნდა თავიანთ პატრონებთან, თუმცა, გაუსაძლისი პირობებისა და შიმშილის გამო, რამდენიმე ცხოველის გადარჩენა ვეღარ მოხერხდა.

უფლებადამცველები ამ რეიდს ვიეტნამში ბოლო დროის ერთ-ერთ ყველაზე მასშტაბურ შემთხვევად აფასებენ. მათი თქმით, ეს ფაქტი კიდევ ერთხელ აჩვენებს ქვეყანაში კატის ხორცით ვაჭრობის რეალურ მასშტაბებს — ბიზნესის, რომლის აკრძალვასაც უფლებადამცველები წლებია უშედეგოდ ცდილობენ.