ირანელ მომღერალ პარასტუ აჰმადსა და მისი შემოქმედებითი გუნდის რვა წევრს 74-ჯერ გამათრახება მიუსაჯეს. მკაცრი განაჩენის მიზეზი მომღერლის YouTube არხზე პირდაპირი ეთერით გადაცემული კონცერტი გახდა.

2024 წლის დეკემბერში, 29 წლის მომღერალმა პატრიოტული სიმღერა Az Khoone Javanane Vatan ჰიჯაბის გარეშე, პირდაპირ ეთერში შეასრულა. სიმღერის გამოსვლიდან მალევე, პოლიციამ ის და რამდენიმე მუსიკოსი მცირე ხნით დააკავა, თუმცა შემდეგ გაათავისუფლა. მოგვიანებით კი, ამ ვიდეოს გამო ხელისუფლებამ მათ წინააღმდეგ საქმე აღძრა.

ირანის ხელისუფლება მათ ინტერნეტში "ვულგარული და ამორალური კონტენტის" გავრცელებასა და საზოგადოებრივი მორალის შელახვაში ადანაშაულებს.

სასამართლო დოკუმენტების მიხედვით, ყუმის პროვინციის სისხლის სამართლის სასამართლომ არტისტებს ფიზიკურ დასჯასთან ერთად, ორი წლით ქვეყნიდან გასვლა და ამავე ვადით პროფესიული საქმიანობა აუკრძალა.

უფლებადამცველები და იურისტები დოკუმენტებზე დაყრდნობით აცხადებენ, რომ რეჟიმის წინააღმდეგ წასული ხელოვანების დაკავება და მათ წინააღმდეგ საქმეების აღძვრა ხელისუფლების მხრიდან პროტესტის ჩახშობის მცდელობაა.

მათი თქმით, რომ 74-ჯერ გამათრახების მისჯა მხოლოდ სიმღერის ჰიჯაბის გარეშე შესრულების გამო კიდევ ერთხელ ადასტურებს, ირანში ადამიანის უფლებების მხრივ არაფერი შეცვლილა.

"ირანის სისხლის სამართლის კანონმდებლობით, ქალების მიერ სიმღერა, მუსიკის შესრულება და მუსიკალური ნაწარმოებების შექმნა ან გავრცელება დანაშაულად არ ითვლება. შესაბამისად, ეს საქმიანობა ვერანაირად ვერ შეფასდება როგორც უხამსი კონტენტის შექმნა, გავრცელება ან გამოქვეყნება".

ადამიანის უფლებადამცველი ადვოკატი, მოინ ხაზაელი.

მრავალი უფლებადამცველი ორგანიზაცია მიიჩნევს, რომ გამათრახება არა ლეგიტიმური სასჯელი, არამედ წამება და არაადამიანური მოპყრობაა. სწორედ ამიტომ, მოინ ხაზაელის თქმით, ხელოვანების, სამოქალაქო აქტივისტებისა თუ სხვა მოქალაქეებისთვის ფიზიკური დასჯა სერიოზულ ეჭვებს ბადებს იმ საერთაშორისო ვალდებულებებთან მიმართებით, რომლებიც სახელმწიფოებს წამების აკრძალვასა და ადამიანის ღირსების დაცვას ავალდებულებს.