ცესკოს წინასწარი შედეგებით, უკრაინის სამივე საარჩევნო უბანზე 327 ხმით გაერთიანებული ოპოზიციის კანდიდატმა, გრიგოლ ვაშაძემ მოიგო. მმართველი გუნდის მიერ მხარდაჭერილმა კანდიდატმა, სალომე ზურაბიშვილმა 181 ხმა მოიპოვა.

ცესკოს პირველადი მონაცემებით ვაშაძე ლიდერობს საზღვარგარეთის საარჩევნო უბნებზე. აზერბაიჯანში, ბაქოში გახსნილ სამივე საარჩევნო უბანზე გრიგოლ ვაშაძემ ჯამში მიიღო 250 ხმა, ხოლო სალომე ზურაბიშვილმა — 41. სომხეთში ზურაბიშვილმა მიიღო 57 ხმა, ხოლო ვაშაძემ 18 მიიღო.

ცესკოს ამ დროისთვის დათვლილი აქვს ხმების 99,78 პროცენტი. წინასწარი მონაცემებით, მმართველი გუნდის მიერ მხარდაჭერილმა კანდიდატმა, სალომე ზურაბიშვილმა ხმების 59,55 პროცენტი მოიპოვა. გაერთიანებული ოპოზიციის კანდიდატმა გრიგოლ ვაშაძემ კი მოიპოვა ხმების 40,45 პროცენტი.

ამ ეტაპისთვის გრიგოლ ვაშაძე ლიდერობს მხოლოდ თელავის, რუსთავისა და საზღვარგარეთის ოლქებში. პირველი ტურისგან განსხვავებით, სალომე ზურაბიშვილმა ამჯერად თბილისში გაიმარჯვა. ასევე, ზურაბიშვილმა გაიმარჯვა ფოთშიც, სადაც პირველ ტურში ვაშაძე ლიდერობდა.

ორი ეგზიტპოლის შედეგები

რუსთავი 2-ისა და იმედის ეგზიტპოლებით საპრეზიდენტო არჩევნებს მმართველი გუნდის მიერ მხარდაჭერილი კანდიდატი სალომე ზურაბიშვილი იგებს. იმედის შედეგებით, საპრეზიდენტო არჩევნებში მმართველი გუნდის მიერ მხარდაჭერილ კანდიდატს, სალომე ზურაბიშვილს ხმების 58 პროცენტი აქვს. გაერთიანებული ოპოზიციის პრეზიდენტობის კანდიდატმა, გრიგოლ ვაშაძემ კი კი ხმების 42 პროცენტი მიიღო.

რუსთავი 2-ის ეგზიტპოლის შედეგების მიხედვით, საპრეზიდენტო არჩევნებში მმართველი გუნდის მიერ მხარდაჭერილი კანდიდატი, სალომე ზურაბიშვილი 55 პროცენტით იგებს. გაერთიანებული ოპოზიციის პრეზიდენტობის კანდიდატმა კი ხმების 45 პროცენტი მიიღო. რუსთავი 2-მა ედისონ რისერჩის ეგზიტპოლის 17:00 საათის მონაცემები გამოაქვეყნა.